¿Sutʼitañachu yachanki?
“Cielopis jallpʼapis jinallamanta rikhurerqa” (Stephen Hawking and Leonard Mlodinow, physicists, 2010).
“Dios ruwarqa cielotawan jallpʼatawan” (Génesis 1:1, Biblia).
¿Diospunichu ruwarqa cielota, jallpʼata, tukuy chaypi kaj imastapis? Chayri, ¿jinallamantachu rikhurerqa? Kay yachaqanaj qallariyninpi imatachus yachayniyoj runas nisqanku, Bibliaj nisqanwan mana kikinchu. Wakin runasqa chay yachayniyoj runaspa nisqankuta creenku, wakintaj Bibliaj nisqanta creenku. Chayrayku ashkha runasqa imatachus creesqankuta librospi qhelqanku, telepipis parlanku. Chayta qhawaspataj ashkha runasqa niña yachankuchu imapichus creenankuta.
Ichapis profesoresniyki nisorqanku tukuy imapis jinallamanta rikhurisqanta, nitaj Dios kasqanta. Jinapis, ¿sutʼitachu rikuchisorqanku imaraykuchus Dios mana kasqanta nisusqankuta? Chantapis ichá uyarillarqankitaj religionta kamachejkuna Dios kasqanta nisqankuta. Jinapis, ¿chayta creenaykipaj sutʼinchasorqankuchu? Chayri, ¿nisusqankuraykullachu creenki?
Ichapis kay imaspi piensarerqankiña, jinapis repararqanki Dios kasqantachus manachus mana sutʼita entiendeyta atikusqanta. Chayrayku chaymanta yachakuy mana importantechu kasqanta niwaj.
Kay revistapi yachakusunchej imaraykuchus ashkha runas Dios tukuy imata ruwasqanpi creesqankuta. Chantá yachakusun imaynatachus kausay qallarisqanta.