66 yachachiy

Saqra reina Jezabel

JEROBOAM wañupusqanmanta qhipanman, 10 ayllusta kamachiqkuna saqrallapuni karqanku. Kaykunamanta aswan saqraqa Achab sutikurqa. ¿Imaraykutaq saqra karqa? Saqra warmiyuq kasqanrayku, warminqa Jezabel sutikun.

Jezabelqa mana israelitachu karqa. Rey Sidonpa ususin. Llulla dios Baalta yupaychan, jinallataq Achabta israelitakunata ima Baal lantita yupaychachirqa. Jezabelqa Jehovata chiqnin, chayrayku profetasta wañuchirqa. Jezabelqa munasqanta ruwananpaq runatapis wañuchin.

Juk pʼunchay Achab may phutisqa kachkaptin, Jezabel tapurqa: ‘¿Imaraykutaq kunan pʼunchay phutisqa kachkanki?’, nispa.

‘Nabot niwasqanrayku. Ñuqa uvas huertanta rantiyta munarqani. Paytaq mana qampatachu kanqa nispa, niwan’.

‘Suyarikuy, ñuqa Nabotpa huertanta qusqayki’ nispa Jezabel nirqa.

Chayrayku Jezabelqa Nabotpa llaqtanmanta kuraqkunaman cartasta qillqarqa: ‘Saqra runasta maskʼaspa, Nabotqa Diospa contranta, reypa contranta parlasqanta nichiychik, chanta jawaman urqhuytawan, rumiswan chʼanqaykuspa Nabotta wañuchiychik’, nispa.

Jezabel Nabot wañusqanmanta yachaytawan, Achabman nirqa: ‘Kunanqa, riy uvas huertanta japʼikanpuy’, nispa. ¿Manachu Jezabel chayjina saqra kasqanrayku jasutʼisqa kanan karqa?

Chayrayku, Jehová Jehuta chay warmita jasutʼinanpaq kacharqa. Jezabel Jehú jamunanmanta yachaspa ñawisninta pintaykukuspa kʼachanchakurqa. Jehú chayamuytawan, Jezabelta ventanapi rikuspa, wasimanta runasman qhaparirqa: ‘¡Uraman chay warmita wikchʼuykamuychik!’, nispa. Paykunataq dibujitupi rikunkijina Jehuta kasuspa, ventanamanta wikchʼumurqanku. Jinamanta saqra Jezabel wañurqa.

1 Reyes 16:29-33; 18:1-4; 21:1-16; 2 Reyes 9:30-37.