¿Imapaq kay folleto ruwakun?

HOLANDAMANTA juk filósofo Spinoza jinata qillqarqa: “Imatachus runas ruwasqankumanta, mana asikunaypaq, mana pisipaq qhawanaypaq, nitaq chiqnikunaypaq mayta kallpachakurqani”. Qampis yachaywasipi yachachiqjina, wak yachakuqkuna, Jehovamanta sutʼinchaqkunap wawasninku ima, imaynachus kasqankuta, imatachus yuyasqankuta ima entiendenaykipaqqa, mayta kallpachakunayki kanqa. Imaraykuchus wakin kuti ichá Jehovamanta sutʼinchaqkunap wawasninkuqa, mana tukuy yachakuqkunajinachu imatapis ruwanqanku, religionninkumanjina yuyasqankurayku. Chayta entiendenaykitaq may allin. Jehovamanta sutʼinchaqkunap wawasninkuta entiendenaykipaq, Jehovamanta sutʼinchaqkunaqa, kay Sociedad Watch Tower Bible and Tract nisqa corporacionniqta kay folletota urqhunku. Chayrayku kay folletota ñawirinaykita munayku.

Wak runa, imapichus creesqanta entiendeyqa mana ninayanchu, religionninman chhapukuchkasqaykita, qhatichkasqaykita, nitaq chay religionman yaykunaykita. Kay folletoqa, mana Jehovamanta sutʼinchaqkunajina yuyanaykipaqchu nitaq tukuy yachakuqkunapis ajinata yuyanankupaqchu ruwakun, manaqa Jehovamanta sutʼinchaqkuna imatachus wawasninkuman yachachisqankuta yachanaykipaq, ajinamantataq paykunata entiendenaykipaq ruwakun. Chaywanpis wakin kutiqa mana tatasninku yachachisqankumanjinapunichu kawsayninkupi ruwanqanku, imaraykuchus sapa jukninku imachus allin, imataqchus mana allin kaqta akllayta yachakuchkanku.

Wak tatasjina, Jehovamanta sutʼinchaqkunaqa, wawasninku yachaywasipi yachakunankuta munanku. Chayrayku wawasninkuman yachachiqninkuta jatunpaq qhawanankuta yachachinku. Chantá paykuna, wawasninku ima, yachachiqkuna entiendesqankumanta, jatunpaq qhawasqankumanta ima, paykunata mayta agradecenku.

Jehovamanta sutʼinchaqkunaqa, pachantinpi may riqsisqas kanku. Chaywanpis wakin runasqa, saqra runas kasqankuta yuyanku. Chayrayku kay folleto, Jehovamanta sutʼinchaqkunap wawasninkuta entiendenaykipaq yanapasunanta munayku. Chantá Jehovamanta sutʼinchaqkunap wawasninkuta imaraykuchus wakin kuti ima raymitapis mana ruwayta munasqankuta entiendenaykita munallaykutaq.