8 Yachaqana
Familiaykipi Dios munasqanta ruway
¿Pitaq familiapi kamachiq umajina? (1)
¿Imaynatá qusa warminwan kawsanan tiyan? (2)
¿Imatataq tata ruwanan tiyan? (3)
¿Imatataq warmi familiapi ruwanan tiyan? (4)
¿Imatá Dios tatamamamanta, wawakunamanta munan? (5)
¿Imatataq Biblia tʼaqanakuymanta, divorciakuymanta nin? (6, 7)
1. Bibliaqa, qusa familiapi kamachiq umajina kasqanta niwanchik (1 Corintios 11:3). Qhariqa juk warmiyuqlla kanan tiyan, ley nisqanmanjinataq casarasqa kanan tiyan (1 Timoteo 3:2; Tito 3:1).
2. Qusaqa pay kikintajina warminta munakunan tiyan. Imaynatachus Jesús discipulonkunata munakuywan apaykachaq, jinallatataq qusa warminwan kawsakunan tiyan (Efesios 5:25, 28, 29). Mana jaykʼaqpis maqananchu tiyan, nitaq kʼumuykachachinanchu tiyan. Manaqa sumaqpaq qhawanan tiyan (Colosenses 3:19; 1 Pedro 3:7).
3. Tataqa sinchita familianpaq llamkʼanan tiyan. Mikhunata, pʼachata, wasita ima, warminpaq, wawasninpaq churanan tiyan. Chantapis, Diosmanta familianta yachachinan tiyan (1 Timoteo 5:8). Payqa familianman Dios munasqanta yachachispa ñawpanan tiyan (Deuteronomio 6:4-9; Efesios 6:4).
4. Warmiqa qusanta sumaqta yanapanan tiyan (Génesis 2:18). Warmiqa qusanta wawakunata yachachinapaq yanapanan tiyan (Proverbios 1:8). Jehovaqa warmi familianta munakunanta, khuyananta munan (Proverbios 31:10, 15, 26, 27; Tito 2:4, 5). Warmiqa qusanta jatunpaq qhawanan tiyan (Efesios 5:22, 23, 33).
5. Diosqa, wawakuna tatamamankuta kasukunankuta munan (Efesios 6:1-3). Chantapis, Diosqa tatamama wawankuta kʼamirinankuta, yachachinankuta ima, munan. Tatamamaqa wawankuwan kanankupaq tiempochakunanku tiyan. Chantapis Bibliamanta, kawsaymanta ima yachachinanku tiyan (Deuteronomio 11:18, 19; Proverbios 22:6, 15). Mana jaykʼaq wawakunata sinchi phiñakuywan, sunqunkuta nanachispa maqanankuchu tiyan (Colosenses 3:21).
6. Qhariwarmi mana allinta kawsanku chayqa, Biblia kʼamisqanta qhatinanku tiyan. Bibliaqa munanakuyman, perdonanakuyman tanqawanchik (Colosenses 3:12-14). Biblia nisqanmanjina, qhariwarmiqa mana ima phiñanakuyraykullapis tʼaqanakunachu tiyan. Chaywanpis, warmiqa qusanmanta tʼaqakunman: 1) qusan mana familianpaq llamkʼayta munaptin, 2) qusan sinchita maqaspa unquchiptin, chayri wañuchiyta munaptin, 3) qusan mana Jehovata yupaychayta saqiptin (1 Corintios 7:12, 13).
7. Qhariwarmiqa mana wasanchakunankuchu tiyan. Qhinchachakuqqa, Diospa contranta, familian contranta ima, mayta juchachakun (Hebreos 13:4). Biblia nisqanmanjina, qhariwarmi qhinchachakuyraykulla divorciakuyta atinku, watiqmantataq casarakuyta atinku (Mateo 19:6-9; Romanos 7:2, 3). Jehovaqa imallamantapis tʼaqanakuqkunata chiqnin (Malaquías 2:14-16).
[16, 17 paginaspi dibujos/fotos]
Munakuq tataqa, Diosmanta familianta yachachin, mikhunata, pʼachata, wasita ima qunllantaq
[16 paginapi dibujo/foto]
Diosqa tatamama wawankuta yachachinankuta, kʼamirinankuta munan