12 Yachaqana

Kawsayta yawartapis respetana

¿Imaynatá kawsayta qhawana? (1) ¿Sulluchiytari? (1)

¿Imaynatataq cristianokuna kawsayninkuta jarkʼanku? (2)

¿Allinchu animalkunata wañuchiy? (3)

¿Imaynatá mana kawsayta respetanchikchu? (4)

¿Imatataq Dios yawarmanta kamachirqa? (5)

¿Yawarta churachikunachu kaman? (6)

1. Jehovamanta kawsay jamun. Diosninchik tukuyman kawsayta quwanchik (Salmo 36:9). Diosqa kawsayta jatunpaq qhawan. Payqa mana nacekuq wawitap kawsaynintapis mayta munakun. Chayrayku Diosqa wawitata sulluchiqkunata juchachan (Éxodo 21:22, 23; Salmo 127:3).

2. Chiqa cristianokunaqa kawsayninkuta jarkʼanku. Camionninkuta, wasinkuta, allinta qhawanku, mana pipis imanarpakunanpaq (Deuteronomio 22:8). Diosta yupaychaqkuna mana pukllanallapaq, asinallapaq kawsayninkuta wañuwan tinkuchinkuchu. Chayrayku mana maqanakuspa, nanachikuspa pukllankuchu, nitaq maqanakuykunata qhawankuchu (Salmo 11:5; Juan 13:35).

3. Ruwawaqninchik animalkunap kawsaynintapis jatunpaq qhawan. Cristianoqa animalkunata mikhunanpaq, pʼachallikunanpaq, jarkʼakunanpaq, unquykunata karunchananpaq ima, wañuchiyta atin (Génesis 3:21; 9:3; Éxodo 21:28). Chaywanpis animalkunata pukllaspa, wañuchiy, ñakʼarichiy ima, mana allinchu (Proverbios 12:10).

4. Cristianokuna mana pitankuchu, mana cocata pikchankuchu, nitaj uma muyuchiq jampitapis upyankuchu. Kaykunaqa mana allinchu, imaraykuchus 1) runata vicioman wataykun, 2) runata unquchin 3) runata chʼichichan ima (Romanos 6:19; 12:1; 2 Corintios 7:1). Mana chay viciokunata saqiyta atikullanchu, chaywanpis Jehovata kusichinapaqqa saqinanchik tiyan.

5. Diosqa yawartapis jatunpaq qhawan. Payqa yawarpi kawsay kasqanta niwanchik. Chayrayku yawarta mikhuqkunaqa juchachakunku. Mana yawarninta suruchispa aychata mikhuqkunaqa juchachakullankutaq. Tʼuqllapi wañusqa, sipisqa, animalta mana mikhunachu tiyan. Jinallataq imawanpis uywata wañuchinchik chayqa usqhayta yawarninta suruchina tiyan (Génesis 9:3, 4; Levítico 17:13, 14; Hechos 15:28, 29).

6. ¿Allinchu kanman yawarta churachikuy? Jehovaqa manapuni yawarta mikhunanchikta munanchu. Chayrayku mana wak runap yawarninta, nitaq jallchʼasqa yawarninchikta churachikunachu (Hechos 21:25). Jinamanta chiqa cristianokuna mana yawarta churachikunkuchu. Chaywanpis doctorpa yanapayninwan, mana yawarniyuq suerota churachikuyta atinku. Paykunaqa kawsayta munanku, chaywanpis, mana tumpatawan kawsanapaq Diospa kamachiyninta wasanchankuchu (Mateo 16:25).

[25 paginapi dibujos/fotos]

Diosta kusichinapaqqa, millay ruwaykunata saqina, mana kawsayninchikwan pukllanachu, nitaq yawarta churachikunachu