Allin willaykunaqa, maypichus tiyakunki chaypi yanapasunkiman
RUNASQA, Diospa kamachiykunasnin tiemponchikpi manaña yanapakusqanta ninku. Chaywanpis, wakin may riqsisqa runasqa, Indiamanta Mohandas K. Gandhi, Rusiamanta León Tolstoi ima, Jesús Urqupi yachachisqanta, may valorniyuqpaq qhawarqanku. Arí, Biblia imaynatachus kawsanata yachachisqanqa, kay runasta mayta tʼukuchirqa. ¿Imaraykutaqrí?
Cristo urqupi yachachisqanqa, runasta, llampʼu sunquyuq kayta, khuyakuyniyuq kayta, chiqan ruwayta ima, maskʼanankupaq yanapan. Yachachillarqataq, mana runa wañuchiyllachu jucha kasqanta, manaqa runapaq phiñakuypis, chantá mana qhinchachakuyllachu jucha kasqanta, manaqa sunqupi munapayaypis. Chantá, mana khuchichakuy kaptin divorciakuytapis, Dios chiqnisqanta yachachirqa, imaraykuchus jinata ruwayqa, familiasta tʼaqan, wawastapis ñakʼarichin. Jinallataq, ‘enemigosninchikta munakunata, mañakuqkunaman qurinata, wakkunata mana juchachanata, imatachus runas ñuqanchikpaq ruwanankuta munanchik, ajinallatataq wakkunapaq ruwananchikta ima, niwanchik’. Runas, kay yuyaychaykunata juntʼaptinkuqa, aswan allinta kawsakunkuman. Maypichus tiyakunki chaypipis, Bibliap kamachisqanta kasukuptinkuqa, kikillantaq kanman.
Jehovamanta sutʼinchaqkunaqa, Bibliap kamachiyninta juntʼanankupaq mayta kallpakunku. Paykunaqa, qhariwarmi kawsayta jatunpaq qhawanku, wawasninkutapis Bibliap kamachisqanmanjina uywanku, jukchasqa familias kanankupaqtaq kallpakunku. Chayjina familiastaq, comunidadespaq, llaqtaspaq, suyuspaq ima, may allin. Yachakusqanmanjina, familias mana jukchasqa kasqankurayku, khuchichakuypi urmasqankurayku ima, allin sayasqa suyuspis urmarqanku. Jehovamanta sutʼinchaqkuna, aswan achkha runasta Bibliamanta yachachiptinku, runata wañuchiy, khuchichakuy, saqra ruwaykuna ima, astawan pisiyanqa.
Achkha suyusta, llaqtasta ima, runata layankurayku chiqnisqanku llakichin. Chaywanpis, apóstol Pedro nirqa: “Cheqamanta reparani, Diosqa mana wakillantachu allimpaj qhawan, manachayqa mayqen nacionllamantapis pichá Diosta manchachikoj, cheqa kajtataj ruwaj runatamin Diosqa allin ñawiwan qhawan”. Apóstol Pablopis, nirqa: “Tukuy runas uj rejllaña kanku: Judío, mana judío; kamachi, mana kamachi; qharipis, warmipis. Qankunaqa tukuyniykichej ujllaña kankichej Cristo Jesuspi” (Hechos 10:34, 35; Gálatas 3:28). Jehovamanta sutʼinchaqkuna kay yachachiyta allinta juntʼanku, chayrayku, mayqin oficinasmantachus Diospa llaqtanta kamachikun chaypi, sucursalespi, qutuchakuykunapi ima, tukuy laya runas, mana chiqninakuspa llamkʼanku, kawsanku ima.
Africapi wakin ayllus, mana jukchasqa kayta atinkuchu. Chaywanpis, Africapi Jehovamanta sutʼinchaqkunaqa, jatuchaq tantakuyninkupi achkha ayllusmanta tantakuspa, Diosta jukchasqa yupaychanku, khuska mikhunku, wasinkuman waqyarinakunku ima, mana maqanakuspa nitaq chiqninakuspa. Chayta rikuspataq kamachiqkuna mayta tʼukunku. Nueva Yorkmanta Amsterdam News (2 agosto, 1958) periodicopi, Jehovamanta sutʼinchaqkuna Nueva York llaqtapi 253.922 jukchasqa tantakusqankumanta jinata nirqa.
“Kay jatun tantakuypiqa, tukuy laya runas, qhapaqkuna, wakchas, karu llaqtasmanta kaspapis, kusisqas, jukchasqastaq kachkarqanku. [...] Chantá, 120 suyusmanta jamuspapis, Jehovamanta sutʼinchaqkunaqa, Diosta jukchasqa yupaycharqanku, kawsarqanku ima. Paykunataq, Estados Unidosman chiqamanta allinpi kawsayta atikusqanta rikuchinku. [...] Kay jatun tantakuyqa, runas jukchasqa kawsayta, llamkʼayta ima, atisqankuta yachachiwanchik.”
Ichá achkha runas, Bibliap yachachiyninqa, kunan tiempopi mana allinchu ninkuman, jina kaptin, ¿ima yachachiytaq aswan allin kanman? Bibliap yachachiyninta maypichus tiyakusqanchikpi juntʼaptinchikqa, mayta yanapawasunman, chaytaq Diospa Reinon Jallpʼata kamachichkaptin, “tukuy nacionesmanta, ayllusmanta” runas jukchasqa kanankuta rikuchiwanchik (Apocalipsis 7:9, 10).
[23 paginapi sutʼinchaynin]
Tukuy laya runas, jukchasqa llamkʼanku
[24 paginapi sutʼinchaynin]
¿Ima yachachiytaq Bibliamanta aswan allin kanman?