Diosta kusichiyta atiwaj

¿IMAYNATÁ Diosta kusichisunman? ¿Imallatapis qosunmanchu?... Jehovaqa nin: ‘Tukuy kʼita animalesqa noqajta, qolqepis, qoripis’, nispa (Salmo 24:1; 50:10; Hageo 2:7, 8). Jinapis uj imata Diosman qosunman. ¿Imataj kanman?...

Jehovaqa payta sirvinatachus manachus, sapa uj ajllanata munan. Munayninta ruwanapajqa, mana tanqawanchejchu. Kunanqa qhawarisun, imaraykuchus ajinata Dios ruwawasqanchejta.

Uj robotta rejsinkichá. Robotqa, imapajchus ruwasqa kashan, chayllata ruwan, manataj waj imastaqa. Jehovaqa munaynillanta ruwananchejpaj, robotman rijchʼakojta ruwawasunman karqa. Chaywanpis mana ajinatachu ruwawarqanchej. ¿Yachankichu imaraykuchus?... Wakin pujllanasqa chay robot jina kanku. Uj botonta ñitʼejtinchej, imapajchus ruwasqa kanku chayta ruwankupacha. ¿Chay jina pujllanasta rikorqankichu?... Runasqa chay jina pujllanasta uj ratolla apaykachanku. Imaraykuchus imapajchus ruwasqa kanku chayllata ruwanku. Diosqa mana munanchu chay pujllanas jina kananchejta, nisunman tanqasqa jinalla kasukunanchejta. Payqa munakusqanchejrayku, kasukuyta munasqanchejrayku ima sirvinanchejta munan.

Tukuy sonqo kasukojtinchej, ¿Tatanchej Jehová kusikunchu?... Kaypi tʼukuriy: Imata ruwasqaykipis tatamamaykita kusichin chayri llakichin, ¿icharí?... Biblia nin: “Yachayniyoj wawaqa tatanta kusichin, mana yachayniyoj wawatajrí mamanta llakichin”, nispa (Proverbios 10:1). Kasukojtiyki, ¿tatamamayki maytacharí kusikunku?... Mana kasukojtiykirí, ¿kusikunkuchu?...

Kunanqa Tatanchej Jehovapi tʼukurina. Payqa imaynatachus kusichinanchejta niwanchej. Bibliapi Proverbios 27:11 versiculota maskʼarina. Chaypi Dios nin: “Yachayniyoj kay, wawáy, kusichiwankitaj; ajinamanta allinta kutichisaj pischus ñakʼarichiwayta munajkunata”, nispa. ¿Ima niyta munan chay?... Sutʼincharina, uj runaqa ñakʼarichisunkiman asipayasuspa, nisqaykita mana juntʼayta atisqaykita nispa ima. Satanasqa chayman rijchʼakojta Jehovata ñakʼarichin chayri asipayan. ¿Yachankichu imaynatachus?... Chayta qhawarina.

Kay libroj 8 yachaqananpi rikorqanchej jina, Satanasqa munarqa Diosmanta aswan patapi kayta, tukuywantaj kasuchikuyta. Payqa wiñaypaj kausayta munasqanchejraykulla Jehovata yupaychasqanchejta nin. Satanasqa Adanta Evatawan Diosta mana kasunankupaj engañaytawan, Diosman nerqa: ‘Runaqa interesraykulla sirvisunki. Noqaqa pillatapis qanmanta karunchayta atiyman’, nispa.

Bibliaqa mana ninchu Satanás chaytapuni nisqanta. Bibliapi Jobmanta leespatajrí, chayman rijchʼakojta nisqanta reparanchej. Satanaspis, Jehovapis yachayta munarqanku, Job, Jehovata sirvinallantapunichus manachus. Astawan yachanapaj, leerina Job libroj 1, 2 capitulosninta.

Job libroj ñaupaj capitulon nin jina, angelesqa Jehovaj ñaupaqenman rerqanku. Satanaspis paykunawan khuska kasharqa. Jehovataj Satanasta taporqa: “Maymantataj jamunkiri?”, nispa. Satanastaj kuticherqa: ‘Jallpʼa patapi puriykachasqaymanta’, nispa. Chantá Jehová nerqa: ‘¿Rikunkichu kamachiy Jobta? Payqa noqata yupaychawan, nitaj ima sajratapis ruwanchu’, nispa (Job 1:6-8).

Supayqa yuyarqa, Job mana tukuy sonqochu Jehovata sirvisqanta. Chayrayku Jehovaman nerqa: ‘Jobqa mana qhasichu yupaychashasunki. Manaña bendecinkichu chayqa, uyaykipi maldecisonqa’, nispa. Jehovataj kuticherqa: ‘Munasqaykiman jina atinki Jobmanta imantapis qhechuyta, cuerpollanta amapuni imanankichu’, nispa (Job 1:9-12).

¿Imatá Satanás ruwarqa?... Jobpa yuntasninta, burrosninta ima suwacherqa, kamachisnintataj wañuchicherqa. Chantá rayo urmamuspa ovejasninta, michejkunantinta ruphaykorqa. Satanasqa camellosnintapis suwacherqa, michejkunantataj wañuchicherqa. Chantaqa uj muyoj wayrata jatarichispa, Jobpa wawasnin kasharqanku chay wasita urmaykucherqa. Chunkantin wawasnintaj wañorqanku. Jobtajrí, Diosta sirvillarqapuni (Job 1:13-22).

Chayrayku Jehovaqa Satanasman nerqa: ‘Jobqa kamachisqayta tukuy sonqo ruwashallanpuni’, nispa. Satanastaj mana jinachu kasqanta yuyarqa. Chayrayku nerqa: ‘Cuerponta nanaykuchejta saqeway, rikunkitaj uyaykipi maldecisusqanta’, nispa. Jehovataj Satanasta chayta ruwajta saqerqa. Jinapis “amapuni payta wañuchinkichu” nerqa.

Satanasqa Jobta, uj millay sarna onqoywan onqoykucherqa. Chay sarnasnin mayta asnasqanrayku, ni pí payman qayllaykuyta munarqachu. Warminpis nerqa: “Diosta maldeciy, jinaspataj wañuy ari”, nispa. Chantá amigosnin Jobta watukoj rerqanku, astawantaj sonqonta nanacherqanku. Paykunaqa sajra imasta ruwasqanrayku chay llakiypi kashasqanta nerqanku. Satanás tukuy chaykunata ruwachejtinpis, Jobqa Jehovata mana wasancharqachu (Job 2:1-13; 7:5; 19:13-20).

¿Imayná Jehová kashanman karqa, Job mana wasanchasqanmanta?... May kusisqa. Chayrayku Satanasman nerqa: ‘Kamachiy Jobta qhawariy. Payqa nisqayta tukuy sonqo ruwan’, nispa. Qanrí, ¿Job jinachu ruwanki? ¿Jehová qanmanta ninmanchu Satanasta llullapaj qhawachisqaykita?... Supayqa pillatapis Jehovamanta karunchayta atisqanta nin. Llulla kasqanta rikuchiyta atisqanchejqa, ¡may sumajpuni! Jesuspis chayta ruwaspa, ¡mayta kusikorqa!

Sumaj Yachachej Jesusqa, Satanás juchaman urmachinanta mana saqerqachu. Chaytaj Tatanta mayta kusicherqa. Jehovaqa Satanasman niyta aterqa: ‘Qhawariy Wawayta. Payqa munakuwasqanrayku manapuni wasanchawanchu’, nispa. Jesuspis Tatanta kusichispa, mayta kusikorqa. Chaytaj wañunankama Diosta sirvinallanpajpuni yanaparqa (Hebreos 12:2).

¿Jesús jinachu qanpis Jehovata kusichiyta munanki?... Chaypajqa Jehová imatachus ruwanaykita munan chayta yachakuy, chayman jinataj kausakuy.