Lloqʼepi: Uj hermanota willashajtin policía japʼishan, Eindhoven llajtapi (Países Bajos, 1945); pañapi: Tiyakunki chaypi, ¿ley nisqanman jina Diosmanta willayta atikullanchu?
4 RAKʼIY
Diospa Reinon tribunalespi atipan: Sumaj willaykunata willajta saqewanchej
WASIMANTA wasi willashajtiyki, policía auto waqaspa astawan astawan qayllaykamushasqanta uyarinki. Wasiyojwan parlarishajtiykitaj, qanwan willashaj hermanoqa waj ladota qhawaykachashan, policía auto ñaupaqeykichejpi sayarpasqanrayku. Policiaqa automanta uraqaytawan jinata tapusunkichej: “¿Qankunachu wasimanta wasi rispa Bibliamanta parlashankichej? Ashkhas quejakamuwayku”, nispa. Qankunataj kʼachallamanta ninkichej Jehovaj testigosnin kasqaykichejta. Kunanrí, ¿imataj kanqa?
Maypichus tiyakusqanchejman jina mana kikin imaspichu rikukusunman. Ñaupaj wataspi, ¿imaynatá gobierno suyuykipi Jehovaj testigosninta qhawaj? ¿Kunanrí religión jina autoridadespajpi qhelqasqañachu kashan? Ichapis qhelqasqaña kashan ñaupaj wataspi, ashkha watasta hermanos leyman jina “evangeliota cheqa kasqanta” rikuchinankupaj tukuy imata ruwasqankurayku (Fili. 1:7). Maypi tiyakojtiykipis Jehovaj testigosnin tribunalespi atipasqankuta yachayqa, creeyniykita kallpachanqa. Kay rakʼiypi chaykunamanta yachakusun. Tribunalespi atipasqanchejqa, sutʼita rikuchin Diospa Reinon kamachishasqantaña. Imajtinchus sapallanchejmantaqa, nichá atisunmanchu karqa.