Pusaj runaslla salvakorqanku

Noeqa familianwan animaleswan ima arcaman yaykorqa. Jehová Diostaj arcaj punkunta wisqʼaykorqa. Chantá parayta qallarerqa. Maytapuni parasqanrayku, arcaqa yakupi tuytuyta qallarerqa. Pisimanta pisitaj, jallpʼa enterota yaku pʼampaykorqa. Arcaman mana yaykoj sajra runasqa wañorqanku. Jinapis Noewan familianwanqa, arcaman yaykusqankurayku mana wañorqankuchu. Paykunaqa maytachá kusikorqanku Diosta kasukusqankumanta.

40 diasta, 40 tutastawan manchayta pararqa. Para pasaytataj pisimanta pisi yaku chʼakiyta qallarerqa. Ajinapi arcaqa uj orqo puntapi tiyaykorqa. Noewan familianwanqa, yaku ashkha kasqanrayku arca ukhullapiraj qhepakorqanku.

Días pasasqanman jina, astawan yaku pisiyarqa. Noewan familianwanqa uj wata kurajta arca ukhupi karqanku. Chantá Jehová Dios nerqa arcamanta llojsimunankuta. Paykunaqa may agradecesqas kasharqanku Dios paykunata salvasqanmanta. Chayrayku Diosman uj jaywanata jaywarqanku.

Jehová Diostaj chay jaywasqankuta allinpaj qhawarqa. Chayrayku nerqa manaña jaykʼajpis runasta, animalestapis jatun parawan chinkachinanta. Chaypajtaj uj kʼuychita señalta jina cielopi rikhuricherqa. ¿Kʼuychita maykʼajllapis rikorqankichu?

Jehová Diosqa Noeman wawasninmanwan kamacherqa wawasniyoj kanankuta, kay jallpʼamantaj juntʼanankuta.