Bibliap nisqanta entiendenaykipaq
2. Ama yuyaychu pantasqa kasqanta
¿Maykʼaqllapis juk runamanta mana allinta parlasurqankuchu? Chantá chay runata riqsispa, ¿kʼachamanta parlapayayta atillarqankichu? Ichá paymanta mana allintachu parlasusqankurayku, kʼacha kaykunasniyuq kasqanta mana reparayta atillarqankichu, ¿icharí? Jinallataq wakin runas, Biblia pantasqa kachkasqanta yachachisqankurayku, achkha runasqa Bibliap yachachisqan chiqa kasqanta mana reparayta atillankuchu.
APÓSTOL Pabloqa, Diospa Palabranta pantasqa kachkasqanta yuyaspa ñawiriy, mana allinchu kasqanta yacharqa. Bibliaqa, ñawpa siglopi wakin judiosmanta parlaspa jinata nirqa: “Diosta tukuy sonqo qhatiyta munanku, manataj cheqa yachayman jinachu”, nispa (Romanos 10:2).
Ajinata yuyasqankurayku achkha judíos, Jesús Mesías kasqanta mana reparayta munarqankuchu. Bibliap profeciasnin Jesuspuni Mesías kasqanta rikuchiptinpis, paykunaqa Jesusmanta pantasqata yuyasqankurayku, chay profecías Jesuspi juntʼakusqanta mana entiendeyta atirqankuchu.
Ajinata ruwasqankumanta, ¿imatá yachakunchik? Biblia pantasqa kasqanta yuyasunchik chayqa, Bibliap nisqanta mana entiendeyta atisunchu.
Estados Unidos suyumanta, religionmanta juk yachachiqqa, “Bibliata runas yuyasqankumanjinalla qillqasqankuta, Bibliamanta wakin pʼitikuna pantasqa kachkasqanta, yuyaychaykunasnin mana yanapanawanchikpaqjinachu kasqanta” ima nirqa. Chaywanpis Bibliata runas yuyasqankumanjinalla qillqasqa kasqanta yuyaspaqa, ima kamachiykunasninchus mana gustawanchikchu, chaykunata qhisachayta munasunman, ¿icharí?
Chaywanpis Bibliaqa, Berea llaqtamanta runasjina ruwananchikta niwanchik. Paykunaqa, apóstol Pablop nisqanta “tukuy sonqo” japʼikurqanku, astawanpis “sapa pʼunchay Diosmanta Qhelqasqata allinta qhawaspa, waturerqanku Pabloj yachachisqan cheqachus manachus kasqanta” (Hechos 17:11). Bibliap nisqanta sumaqta entiendeyta munaspaqa, wakkuna Bibliamanta mana allinta parlasqankuta mana kasuspa, Bereanosjina Bibliata ukhunchananchik tiyan. Chayrayku paykunajina ruwanaykipaq mayta kallpachakuy.