May valorniyuq imasta tarikun
¿MAYKʼAQLLAPIS ni imata tariyta suyasqayki lugarpi, may valorniyuq imata tarikurqankichu? Kay 2005 wata, marzomanta 27 pʼunchaypi, Estonia suyumanta Jehovamanta sutʼinchaq, Ivo Laud, Alma Vardja kuraq hermanata, thanta wasinta urmachiyta yanapachkasqanpi may sumaq valorniyuq imata tarirqa. Chay wasip jawa pirqanta urmachichkaspa, juknin postepi juk tablata rikurqanku. Chay tablata urqhuspataq, aswan juchʼuy tablata rikurqanku, chaytawan urqhuspataq, juk juskʼuta rikurqanku, anchonmanqa 15 centimetrosniyuq karqa, sayayninmanqa 1 metro khuskanniyuq, ukhunmantaq 15 centímetros karqa. (1) ¿Imataq chay ukhupi karqa? ¡May valorniyuq imas karqa! ¿Pitaq chaypi pakaykurqa?
Chay juskʼupiqa, phatu papelwan sumaq maytʼusqa paquetesta tarirqanku. (2) Chay paquetespiqa, Jehovamanta sutʼinchaqkunap publicacionesninku karqa, astawanqa qutuchakuypi ukhunchanapaq La Atalaya revista karqa (wakinqa 1947 watamanta). (3) Chay publicacionesqa, makiwan qillqasqa karqa. Chantapis, chay paquetespiqa wak documentostawan tarirqanku. Chay qillqasqasmanjinataq chay paquetestaqa, Alma Vardjap qusan Villem, achkha watas ñawpaqta churasqa. Chantapis, imatachus wisqʼasqa kachkaptin ruwasqanmanta qillqasqasta tarirqanku. ¿Imaraykutaq carcelpi wisqʼasqa kasqa?
Hermano Villemqa, Estonia suyumanta Tartu, Otepää ima, qutuchakuykunapi llamkʼarqa. Yachakusqanmanjinaqa, niraq segunda guerra mundial qallarikuchkaptin Diosta riqsisqa. Kay 1948 wata, diciembremanta 24 pʼunchaytaq, comunista partidomanta kaqkuna, Diospaq llamkʼasqanrayku carcelman wisqʼasqanku. Policiasqa, Jehovamanta sutʼichaqkunap sutisninkuta yachayta munaspa tapusqanku. Chantapis, mana juezkunap ñawpaqinman apaspalla, Rusia suyupi chunka watata carcelpi wisqʼasqanku.
Villemqa, kay 1990 marzomanta 6 pʼunchaypi wañupurqa, chay pʼunchaykamataq Diosta chiqa sunqu yupaycharqa. Warminqa, chay pakasqa paquetesmanta ni imata yacharqachu. Qusanqa, ichá mana willarqachu tapuptinku jarkʼayta munaspa. ¿Imaraykutaq chay publicacionesta kay hermano pakaykusqa? Imaraykuchus, Comité de Seguridad del Estado soviético (KGB) nisqasqa, wasisman ima ratollapis publicacionesta maskʼaq riq kanku. Chayraykuchá hermano Villemqa, chay paquetesta pakarqa, hermanospaq Diosmanta yachachiy mana pisinanpaq, KGB nisqas achkhata qhichuptinkupis. Kay 1990 wata qʼuñi tiempopi, hermano Villem Tartu llaqtapi publicacionesta pakanapaq ruwasqasninta tarillarqankutaq.
¿Imaraykutaq chay paquetes may valorniyuq kasqanta ninchik? Imaraykuchus chay tiempopi hermanosninchik, makinkuwan publicacionesta sumaqta qillqasqanku, allinta pakasqanku imaqa, Diospa yachachiykunasninta may allinpaq qhawasqankuta rikuchin (Mat. 24:45). Qamrí Diosmanta yachachiykunata, ¿kikillantataqchu qhawanki? Kunanqa chay may valorniyuq Diosmanta yachachiy, nisunman Torremanta Qhawaq revista, estonio qallupi, 170 qalluspi ima, urqhukun.