‘Sumaq ruwasqasninqa mana chinkanqachu’
THEODORE JARACZ hermanoqa, Diospa Llaqtanta Kamachiqkunamanta juknin karqa. Payqa, 2010 watapi, 9 junio miércoles paqarinta wañupuspa, Jallpʼapi ruwanasninta tukuchan. Payqa, 84 watasniyuq karqa, Melita warminwantaq 53 watasta kawsakurqa. Familianmantaqa, juk ñañan, juk sobrinon, iskay sobrinasnin ima, qhipakunku.
Hermano Jaraczqa, Estados Unidospi (Kentucky, Pike County) 1925 watapi septiembre 28 pʼunchaypi paqarikurqa, 1941 watapitaq agosto 10 pʼunchaypi, 15 watasniyuq Jehovaman qukuspa bautizakurqa. Chunka qanchisniyuq kachkaspataq precursor regularjina llamkʼayta qallarirqa. Payqa, yaqha 67 watasta tiempo juntʼasqata Diospaq llamkʼarqa.
Hermano Jaraczqa, 1946 watapi 20 watasniyuq Escuela de Galaad clase 7 nisqaman rirqa. Chaymantataq qutuchakuykunata waturiqtajina Estados Unidos suyumanta, Ohio (Cleveland) llaqtaman kacharqanku. Kay 1951 watapitaq Australia suyup sucursalninman kacharqanku, chay sucursalpi kamachinanpaq. Kay Anuario de los testigos de Jehová para 1983 nisqa libropiqa, hermano Jaraczmanta jinata nin: “Payqa, Diospa llaqtanpi imapis allin ruwakunanpaq llamkʼaspa, willanankupaq sumaqta kamachispa ima, suyuntinmanta hermanosta mayta kallpacharqa”, nispa.
Estados Unidosman kutipuspataq hermano Jaraczqa, 1956 watapi diciembre 10 pʼunchaypi, Melita Lasko hermanawan casarakurqa. Casarakuspataq qutuchakuykunata waturispa, superintendente de distritojina ima, Estados Unidospi llamkʼayta qallarirqanku. Kay 1974 watapitaq hermano Jaraczta, Diospa Llaqtanta Kamachiqjina llamkʼananpaq waqyarirqanku.
Hermano Jaracz, Jehovaman chiqa sunqu kasqanta, Diospaq sunqu kʼajaywan llamkʼasqanta ima, yuyarikullasunpuni. Payqa qusajina, kʼacha, pacienciayuqtaq karqa. Diosta yupaychaypi sinchi sayasqa karqa, wakkunap allinninkutapunitaq maskʼaq (1 Cor. 13:4, 5). Arí, payqa wakkunapaq chiqan kaqtapuni ruwarqa, khuyakurqataq. Chantapis, runasman sunqu kʼajaywan willaspa wakkunata mayta munakusqanta, paykunamanta llakikusqanta ima, rikuchirqa.
Hermano wañupusqanmanta mayta llakikunchik. Paytaqa, Betelmanta, wak hermanos ima, mayta munakurqanku. Chaywanpis, Jehovata achkha watasta chiqa sunqu yupaychasqanmanta mayta kusikunchik. Payqa, ‘wañupunankama sayasqanrayku, kawsay pilluta japʼinña’ (Apo. 2:10). Chantapis, ‘sumaq ruwasqasninqa mana chinkanqachu’ (Apo. 14:13).