Machkha watayuqpis Diosta yupaychayta atillasunmanpuni
Kay 2009 wata 19 diciembre killapi Málaga llaqtapi (Españap uraniqninpi) juk mama, wawanwan bautizakurqanku, iskayninkutaq Ana sutikunku. Chay watapiqa, Españapi 2.352 runas bautizakurqanku. Paykuna bautizakusqankuqa, tʼukunapaq karqa. Imaptinchus, mama kaqqa 107 watasniyuq karqa, wawantaq 83 watasniyuq.
¿Imaraykutaq Jehovaman qukuspa bautizakurqanku? Kay 1970 wata qallariypiqa, Jehovamanta sutʼinchaq vecinanku, wasinpi Libromanta Yachaqanapaq Tantakuy ruwakusqanman chay warmip wawanta waqyarisqa. Paytaq chay tantakuyman achkha kutista rispapis, llamkʼayninrayku mana ñawpariyta atisqachu.
Chaymanta chunka watasninmanqa, wakin wawasnin Bibliamanta yachakuyta qallarisqanku, bautizakusqankutaq. Juknin kaqqa Mari Carmen sutiyuq, mamanta chiqa kaqta watiqmanta yachakunanpaq yanapasqa, chayrayku Bibliamanta yachakuyta qallarisqa. Mari Carmenpa abuelan Anapis, Bibliamanta yachakuyta munallarqataq. Familiankumantaqa, chunka ukhu chiqa kaqta tukuy sunqu japʼikurqanku.
Bautizakuchkaptinkuqa, iskayninku may kusisqas kachkarqanku. Mamanqa, jinata nirqa: “Jehovaqa may kʼachapuni ñuqapaqqa, imaptinchus payta riqsinayta saqiwarqa”, nispa. Wawantaq nirqa: “Paraíso chayamunankama Jehovata yupaychayta, munayninta ruwayta, runasman willayta ima, munani”, nispa.
Kay iskay viuda hermanasqa, tantakuykunapi kaspa mayta kusikunku. Qutuchakuyninkumanta juk anciano nin: “Ni jaykʼaq tantakuykunaman faltakunkuchu, Torremanta Qhawaq revistata ukhunchakuchkaptintaq tapuykunaman kutichinankupaq wakichisqapuni kanku”, nispa.
Kay hermanasqa, Bibliapi parlaq Anamanta yuyarichiwanchik. Payqa, “yupaychana–wasita mana sakejchu. Astawanpis tuta pʼunchay Diosta yupaychaj mana miqhuspa paymanta mañacoj”. Mana saqispa risqanrayku, Jesusta wawita kachkaptin rikurqa (Luc. 2:36-38, Dios Parlapawanchej). Payqa, 84 watasniyuq kaspapis Jehovata yupaychananpaq mana awichitaña kasqantachu yuyarqa. Kay tiempomanta iskaynin Anaspis kikillantataq ruwachkanku.
Familiaykimanta pillapis Bibliamanta yachakuyta, ¿munanchu? Chayri, ¿riqsinkichu juk machituta chayri awichitata Bibliamanta wasinpi yachakuyta munaqta? Chaykunamanta, mayqinnillankupis kay iskay Ana sutiyuq hermanasjina kankuman. Imaptinchus Jehovataqa, machkha watayuqpis yupaychallasunmanpuni.
[25 paginapi sutʼinchaynin]
“Jehovaqa, may kʼachapuni ñuqapaqqa”
[25 paginapi sutʼinchaynin]
“Paraíso chayamunankama Jehovata yupaychayta munani”