“Juk qutujina creeyninkupi sinchita sayasqankuqa jatunpaq qhawanapaq”

ALEMANIAMANTA kamachiq Adolf Hitlerman, kamachiyninpi may ñakʼariy kachkaptin achkha cartasta apachirqanku. Kay 1945 watapi, soviéticos Berlín llaqtata japʼikapusqankutawan, achkha cartasta Moscuman apakapurqanku. Juk historiador Henrik Eberle, Hitlerman pichus, imapaqchus cartasta apachisqanta, yachayta munaspa Moscupi achkha waqaychasqa cartasta ukhuncharqa. Chayraykutaq kay qhipa wataspi, Cartas a Hitler, nisqa librota urqhurqa.

Henrik Eberle nirqa: “Hitlermanqa, yachachiqkuna, yachakuqkuna, monjas, sacerdotes, mana llamkʼayniyuqkuna, qhatuqkuna, soldados ima, cartasta qillqarqanku”, nispa. Chantá nillanpuni: “Wakinqa, Hitlerta Mesiastajina jatunpaq qhawarqanku, wakintaq pay kikin saqra kasqanta nirqanku”, nispa. Chaywanpis, mana allinta ruwachkasqanmanta llulla religionesta kamachiqkuna, ¿cartasta payman apachirqankuchu? Arí, chaywanpis pisita apachirqanku.

Henrik Eberleqa, Jehovamanta sutʼinchaqkuna Alemaniap tukuy kʼuchusninmanta achkha cartasta nazispa saqra ruwaykunasninkuta juchachaspa apachisqankuta tarirqa. Arí, Jehovamanta sutʼinchaqkuna 50 suyusmanta 20.000 cartasta, telegramasta ima apachirqanku, paykunata mayta ñakʼarichichkasqankuta nispa. Nazisqa, paykunamanta waranqasta carcelman wisqʼarqanku, may chhikataq ñakʼarichisqankurayku wañurqanku. Chayta yachaspa, Eberle nirqa: “Nazisqa, achkha runasta ñakʼarichirqanku, chaykunamanta nisqataq Jehovamanta sutʼinchaqkunaqa pisilla karqanku. Chaywanpis paykuna juk qutujina creeyninkupi sinchita sayasqankuqa, jatunpaq qhawanapaq”.