Diospa Llaqtanta Kamachiqkunapta cartan
JEHOVAMANTA sutʼinchaqkunaqa Jesusjina Diosmanta mayta mañakunchik: ‘Sutiyki llimphuchasqa kachun’, nispa. Kayta rikuchinchik, kawsayninchikpi Diosmanta mañakusqanchikmanjina kawsaspa. Chaywanpis, mana Diospa sutinta yachanallanchikchu tiyan, manaqa tukuy tiempopi Diospa sutinta jatunchananchik tiyan. Chayrayku, Diospa sutʼinchaqnin kayqa, mana imawanpis kikinchakunmanchu (Mat. 6:9; Isa. 43:10).
Salmo 110:3 nisqanmanjina Diospa llaqtanqa, tukuy sunqunwan Diospa kamachisqanta ruwan. ¿Imaraykutaq jatunpis, juchʼuypis sunqu kʼajaywan Diospa nisqanta willankuri? Diosta munakusqankurayku, payllata yupaychayta munasqankurayku ima. Deuteronomio 6:5, 6 niwanchik: Jehová ‘Diosta tukuy sunquykichikwan, tukuy almaykichikwan, tukuy kallpaykichikwantaq’ munakuychik, nispa. Jinata munakusqanchikrayku, tiemponchikwan, kallpanchikwan, kapuyninchikwan ima, Diospa Reinon ñawpaqllamanpuni rinanpaq yanapanchik. Chayta ruwanchik, atisqanchikmanjina runaman willaq lluqsispa.
Jehová Diosninchikqa, runata munakun, manataq pipis wañunanta munanchu, chayrayku tukuy runaman Reinonmanta sumaq willaykunata willamunanchikpaq kachawanchik. Diosqa runa saqra ñanninta saqispa, payta maskʼanankuta munan, jinamanta wiñaypaq kawsanankupaq (2 Ped. 3:9). Jehovaqa nin: ‘Mana munanichu juchasapa runa wañunanta, astawanqa munani saqra ruwanasninmanta kutirikamuspa kawsananta’, nispa (Eze. 33:11). Diosmanta willamuspaqa, Diosninchik runata chiqamanta munakusqanta, rikuchinchik. Chayta ruwaspataq, sunqunchik maytapuni kusikun.
Diospa palabranta sumaqpaq qhawaspaqa, Jehovata mayta munakusqanchikta rikuchinchik. Biblia mana kaptinqa, Diosta mana riqsiyta atisunmanchu karqa, nitaq Santiago 4:8 nisqanmanjina Diosman qayllaykuyta atisunmanchu karqa. Manallataq, imapaqchus kaypi kasqanchikta, maymanchus richkasqanchikta, nitaq imaynatachus Adán juchachakuspa llakiy kawsayta saqiwasqanchikta yachasunmanchu karqa (Rom. 5:12). Chantapis, Dios jatun munakuyninrayku, churinta kay jallpʼaman kachamusqanta mana yachasunmanchu karqa. Jehová Diosninchikqa, tukuy imaymanamanta riqsiyninta, yachayninta, yuyayninta, ima willawanchik. Chayrayku, ¡may sumaqpaq pay yuyaychasqan Palabranta quwasqanchikta qhawanchik! Bibliata ñawirinapaq, chaypi tʼukurinapaq ima, tiempochakuspa Diosman Bibliata quwasqanchikrayku pachis nichkanchik (Efe. 5:15, 16; Sal. 1:1-3). Mana jaykʼaq Diospa palabranta sapa pʼunchay ñawiriytaqa, llasapaqchu qhawananchik tiyan. Diosta munakuspaqa, Bibliata ñawiriyta munasunchik, jinamanta astawan sumaqta Jehovata riqsispaqa, astawan payta munakusunchik.
Bibliapiqa, Adán juchachakuspa, tukuy mirayninman llakiy kawsayta saqisqanta yachakunchik. Chaywanpis, Diosqa runata yanapayta atirqa, jinatataq ruwan, chhikamanta chhika kay jallpʼapaq munaynin jutʼakunanpaq tukuy imata wakichin (Gén. 3:15).
Tukuypis Diospa sutinta tukuy imata ruwaspa jatunchayta munanchik. May jatun Jehová Diosninchikta astawan riqsisunchik chayqa, astawan nisqanta kasukuyta munasunchik, llaqtanwantaq Diospa sutinta riqsichispa astawan llamkʼayta munasunchik. Kunantaq Dios munakuwasqanchikta, yanapawasqanchikta, chantapis musuq pachanpi wiñay kawsayta quyta munawasqanchikta, sutʼita rikunchik.
Diospa llaqtanta kamachiqkuna, mayta munakususqaykuta yachanaykichikta munayku. Chantapis, kay tukukuy pʼunchaykunapi manaraq ‘jatun llakiy’ chayamuchkaptin, tukuyman willanaykichikpaq kallpachakuspa tiempochakusqaykichikmanta, sunqumanta pacha, pachis niyku (Apo. 7:14). Jinamanta, qamkunajina uyarikuqkunapis, Diosmanta Cristomanta ima, yachakusqankurayku wiñaypaq kawsayta atinqanku (Juan 17:3).
Hermanosniykichik,
Jehovamanta sutʼinchaqkunata kamachiqkuna
[5, 6 paginaspi sutʼinchaynin]
Qillqanapaq