Tapuykunapaq

◼ Wakin hermanosqa tantakunku Bibliamanta chʼaqwanankupaq, ¿imaynatá ‘allin kamachiy yuyayniyuqtaq’ chayta qhawan? (Mat. 24:45, 47.)

Mana allinpaqchu qhawan. Ajinapis Jallpʼantinpi wakin hermanosqa, paykunalla qutukuchakuspa, runap librosninta ñawirinku Bibliawan kikinchanapaq. Wakinkunataq ñawpa hebreo simita, chayri griego simita yachakuchkanku, kay Traducción del Nuevo Mundo nisqa chiqachus manachus kasqanta qhawanankupaq, wakinkunataq ciencia nisqamanta Biblia chiqa kasqanta manachus, maskʼanku. Astawanpis wakinkunaqa Internet nisqapi, tarisqankuta chayri yuyasqankuta qillqanku, chayta wakkuna ñawirinankupaq, chaymanta parlanankupaq ima. Mana chayllachu, astawanpis wakinkunaqa paykunalla tantakunku yachasqankumanta chʼaqwanankupaq, chantapis yachasqankumanta librosta urqhunku, tarisqankuta rikuchinankupaq, chayri tantakuyninchikpi, La Atalaya revistaspi ima, yachakusqanchikman yapaykunankupaq.

Jehová Diosqa Jallpʼantinpi, tantakuyniqta, jatuchaq tantakuyniqta, Bibliamanta imaymana librokunata quspa llaqtanta kallpachachkan. Tukuy kaykunaqa, Diospa espíritu santonniqta, Bibliap nisqanmanjinataq ruwakun, tukuyninchik ‘jukchasqapuni kananchikpaq, juk sunqulla, juk yuyayllataq’, ‘iñiyninchik kallpachasqa’ kananpaq (1 Cor. 1:10; Col. 2:6, 7). Mayta kusikunchik allinta Jehová yachachiwasqanchikmanta kay qhipa pʼunchaykunapi. Chayrayku, wakin hermanos librosta yuyasqankumanta urqhusqankuqa, Bibliamanta chʼaqwanankupaq tantakusqankuqa, Internetpi runap librosninpi tarisqankumanta qillqasqankuqa ima, mana allinchu kachkan, imaptinchus chaykunaqa mana ‘allin kamachiy yuyayniyuqmantachu’ jamun (Mat. 24:45-47).

Yachayninchikwan hermanosta yanapayqa, may sumaq. Chaywanpis, qutuchakuyniqta Jesucristo ruwasqantaqa ni jaykʼaq pi runapis, yachayninwan ayphuyachinanchu tiyan. Apóstol Pabloqa, ñawpa cristianosta tiemponta mana usuchinankupaq, nitaq ima chʼaqwaypipis satʼikunankupaq, kayta nirqa: ‘Amataq uyariychikchu llulla cuentosta, ñawpa tataspa tukuynin sutisninkumanta qillqasqata ima. Chaykunaqa runasta churanachin, manataq yanapawanchikchu Diospa imasninpi wiñananchikpaq mayqinkunachus iñiyninchikniqta jamun chaypi’ (1 Tim. 1:3-7). Chayrayku tukuy cristianoqa “wampu churanakuykunamanta, ñawpa tataspa sutisninku qhelqasqamanta, siminakuymanta”, ima, jarkʼakunan tiyan “imaraykuchus chay tukoyqa yanqhalla kaspa, ni imapi yanapanchu” (Tito 3:9).

Bibliamanta astawan ukhunchayta munaqkunaqa, kay Perspicacia para comprender las Escrituras nisqata, chayri “Toda Escritura es inspirada de Dios y provechosa” nisqata, ñawirinkuman. Chantapis ‘allin kamachiy yuyayniyuqqa’ kay librostawan: Las profecías de Isaías, Las profecías de Daniel, Apocalipsis libro ima, urqhullantaq, Bibliap profeciasninta ukhunchananchikpaq. Kay librokunapiqa achkhata ñawirispa yachakunapaq, tʼukurinapaq ima tarisunchik, jinamanta ‘Diospa munayninta riqsispa juntʼa kananchikpaq espiritup qusqan tukuy yachaywan, yuyaywan ima. Ajinata Señorpa munayninmanjina purinanchikpaq, tukuy imapi Diosta kusichispa. Ajinamanta kawsayninchikpi allin ruwanasniyuqpuni kananchikpaq, jinataq Diosta astawan astawan riqsisunchik’ (Col. 1:9, 10).