‘Qhipayta jamuy’

1. Bibliamanta Yachaqanapaq tantakuypi qhipan killaspi, ¿imamantá yachakuyta qallarisunchik?

¹ Bibliamanta tawa Evangeliosqa, Jesús kay Jallpʼapi kachkaspa imastachus ruwasqanmanta sutʼita parlanku. Ñuqanchikpis Jesusjina ‘kikillantataq ruwananchikpaq’, marzo killa 1 semanamantapacha ‘Qhipayta jamuy’ nisqa librota, Bibliamanta Yachaqanapaq tantakuypi ukhunchayta qallarisunchik, chaypaqtaq sumaqta uyarinanchik tiyan, ñawpaqmantataq wakichikuna (1 Ped. 2:21; Mar. 10:21). Kay libromantaqa, imaschus willayninchikpi kallpachanawanchikpaqjina kaqkunata astawan qhawarisun.

2. Jesús ñakʼariykunata muchusqan, ¿imaynatá yanapawanchik?

² Jesusmanta yachakuna. Willaypi runa mana uyariwaptinchik, ¿imayna sientekunchik? Ichá Jesuspa nisqanta yuyarikuwaq: ‘Ñuqatachus qhatiykachawarqanku chayqa, qamkunatapis qhatiykachallasunqachiktaq’, nispa (Juan 15:20). Chaywanpis mana tukuy mana uyariyta munaqkunachu, qhatiykachachkawanchik. Jesusqa, Diospa churasqan kusiyta aswan qhipaman tarinanta yachasqanrayku, tukuy laya ñakʼariykunata muchurqa. Ñuqanchikpis Diospaq ñawpaqinpi sumaqpaq qhawasqas kayta, chiqa sunqu kaspa tʼinkanawanchikta ima, maskʼasun chayqa, mana llawchʼiyaspa willamullasunpuni (Heb. 12:2, 3; Pro. 27:11). Diosmanta willamullasunpuni chayqa, Cristo yanapawasunpuni (Mat. 28:19, 20).

3. Jesusjina runasman willarinanchikpaq, ¿imatá ruwasunman?

³ “Chaypaj kachamusqa kani.” Jesusqa, Diospa Reinomanta willayta ñawpaqman churarqa, chaypaqtaq mayta kallpachakurqa (Luc. 4:43). Usqhayta willana kasqanta yachasqanraykutaq, tukuyman willaraqpuni. Ñuqanchikpis Jesusjina ruwasqanchik, ¿imaman tanqawasunchik? Mayllapipis kachkaptinchik, ¿Diospa Reinonmanta willamusunmanchu? Cristop munakuyninqa, tukuy runasman Diosmanta parlarinanchikpaq tanqawasunchik (2 Cor. 5:14).

4. Jesusjina Diosmanta runasman yachachinanchikpaq, ¿imatá ruwananchik tiyan?

⁴ ‘Ni pí payjina parlarqachu.’ Runasqa, Jesuspa yachachiyninta uyarispa, tʼukuchkaq qhipakuq kanku (Juan 7:46; Mat. 7:28, 29). ¿Imaptin? Wak yachachiqkunamanta, ¿imapitaq wakjina karqa? Chiqa yachachiykunata, pikunamanchus yachachiq paykunata ima munakusqanrayku. Chantapis, tukuy imaymanamanta yachachiq. Jesusjina ruwasunchik chayqa, aswan allinta yachachisunchik (Luc. 6:40).

5. ‘Qhipayta jamuy’ nisqa librota ukhunchachkaspa, ¿imata yachakunapaqtaq kallpachakunanchik tiyan?

⁵ Kay yachaqanapi Jesusmanta qhawarisqanchikqa wakinkunalla. ¿Jesusmanta ima allin yachachiykunatawantaq yachakusunman? Bibliamanta Yachaqanapaq Tantakuypi, Jesucristojina parlanapaq, ruwanapaq ima, paypa ‘munakuyninta sumaqta riqsinanchikpaq’ kallpachakuna (Efe. 3:19).