¿Ancha pisitachu willamuchkani?
1. Chiqa sunqu cristianota, ¿imastaq llakichinman?
1 ¿Maykʼaqllapis ancha pisita willachkasqaykita yuyarqankichu? Machuyasqaykirayku, unqusqa kasqaykirayku chayri familiaykipi achkha ruwanasniyuq kasqaykirayku, ichá pisillataña Diosmanta willamuchkanki chayraykutaq, may llakisqa kachkanki. Juk hermana kimsa wawasniyuq, familianpi achkha ruwanasniyuq kasqanrayku, willamunanpaq manaña tiempon, kallpan ima kanñachu chayraykutaq, mayta llakikun. Kayjinaspi rikukuspa, ¿imataq maychus kaqllata yuyanapaq yanapawasunman?
2. ¿Imatá Jehová ruwananchikta munan?
2 ¿Imatá Jehová ruwananchikta munan? Tukuypis Diosmanta astawan willamuyta munanchik. Chaywanpis, ruwayta munayqa, mana kikinchu chiqamanta ruwayta atisqanchikwan. Astawan willayta munasqanchikqa, ruwachkasqanchikwan mana kusisqachu kachkasqanchikta rikuchin. Yuyarina, Jehovaqa maykamachus ruwayta atisqanchikta yachan, manataq, mana ruwayta atisqanchiktaqa mañawasunmanchu (Sal. 103:13, 14). Chantá, ¿imata ruwananchiktataq munan? Tukuy sunquwan yupaychananchikta munan (Col. 3:23, 24).
3. Imatachus ruwananchikta, ¿imaynatá yachasunman?
3 Imatachus ruwananchikta, ¿imaynatá yachasunman? Ñawpaqtaqa, Jehovamanta yanapayninta mañakuna, maykamachus ruwayta atisqanchikta qhawarikunapaq (Sal. 26:2). Chantá, juk sumaq wakichisqa cristiano allinta riqsiwaqninchikta tapurisunman, pay imaspichus astawan allinyananchikta mana manchachikuspa ninawanchikpaq (Pro. 27:9). Chaywanpis tiempo pasasqanmanjina, mana tukuy imapis kikillanpunichu, chayrayku allin kanman sapa kuti kawsayninchikta qhawarikunanchik (Efe. 5:10).
4. Willamunallapaqpuni yuyarichiykunata, ¿imaynatá japʼikusun?
4 Willamunallapaqpuni yuyarichiykunata, ¿imaynatá japʼikusun? Kaypi tʼukurina, bicicletaspi correqkunamanta pichus atipananta munaqtaqa, qhaparispa kallpachanku atipananpaq, manataq pantachiyta munaspachu qhaparinku. Kikillantaq, tantakuykunapi, publicacionespi ima, “Diospa Palabranmanta willaraypuni” nispaqa, kallpachawanchik, manataq pisita ruwachkasqanchiktachu nichkawanchik (2 Tim. 4:2). Willamunapaq sumaqta kallpachakuptinchikqa, ‘Diosqa manapuni qunqapunqachu ruwasqasninchikmanta, payta munakusqanchikmanta’ ima (Heb. 6:10).