¿Manachu domingosta willayman lluqsiwaq?
1. Pablo, compañerosnin ima Filipos llaqtapi ruwasqanku, ¿imatá yachachiwanchik?
1 Pablo, compañerosnin ima misionerosjina viajachkaspa Filipos llaqtapi kachkarqanku, sábado pʼunchaytaq karqa, achkha judiostaq samarikuchkarqanku. Paykuna chay pʼunchaypi samarikuyta munankuman karqa chayqa ni pipis qhawaranmanchu karqa. Chaywanpis judíos llaqtap jawanpi Diosmanta mañakuq risqankuta yachasqankurayku, paykunaman willaq rirqanku. Willasqankuraykutaq Lidia, familian ima bautizakurqanku. Chaypi willasqankumanta, ¡maytachá kusikurqanku! (Hech. 16:13-15.) Kay tiempopi domingo pʼunchayta achkha runas samarikunku, ¿manachu allin kanman paykunata willarimuna?
2. Diospa llaqtan domingosta willananpaq, ¿ima chʼampaykunatataq atiparqa?
2 Chʼampaykunata atipakusqan domingo pʼunchayta willanapaq. Diospa llaqtanta 1927 watapi domingosta willanapaq kallpachakurqa. Estados Unidos suyupi kamachiqkuna churanakuyta qallarirqanku, achkha hermanosta samarikuna leyesta pʼakisqankumanta, mana samarikuyta saqisqankumanta, mana permisoyuq vendesqankumanta ima tumpaspa presocharqanku. Chaywanpis mana llawchʼiyarqankuchu. Chay wataspi, “campañas de las divisiones” nisqata wakichikurqa, qayllapi kaq qutuchakuykunamanta willaqkuna, achkha juchʼuy qutuspi juk chiqanpi willaq rinankupaq. Wakin kutispi achkha willaqkuna kasqankurayku tukuyninkuta mana presochayta atirqankuchu. Chay tiempopi hermanos domingosta willayta atinanchikpaq, kallpachakusqankuta, ¿jatunpaqchu qhawanchik?
3. ¿Imaraykutaq domingo sumaq willanapaq?
3 ¿Imaraykutaq sumaq willanapaq? Achkha runas domingota mana llamkʼasqankurayku samarichkanku. Religionniyuq kaqkuna ichapis Diosmanta astawan parlayta munankuman. Domingo tantakuyninchik ruwakun chayqa, willaypaq pʼachallisqaña kachkanchik, ¿manachu allin kanman tantakuy manaraq qallarichkaptin chayri tukukusqantawan willaq lluqsinapaq wakichikunanchik? Necesitaspaqa, mikhunitata apakuwaq.
4. Domingota machkha tiempollatapis willaptinchik, ¿ima kusiytataq tarisunman?
4 Domingota machkha tiempollatapis willaq lluqsiptinchikqa samarikunapaq tiempo kapuwasunraq. Jehová Diospaq llamkʼasqanchikmanta astawanraq kusikusunchik (Pro. 19:23). Ichapis ajinata willaspaqa Lidiatajina, kʼacha runasta tarisunman.