Diospa Llajtanta Kamachejkunaj cartanku
Munasqa hermanos, hermanas:
Janaj pacha Tatanchej Jehovaqa, ni pi jina munakuyninta rikuchin. Chayrayku Bibliaqa nin: “Diosqa munakuymin”, nispa (1 Juan 4:8). Tukuy Atiyniyoj kajtinpis, Palabranqa mana paymanta ninchu: “Diosqa kallpa” chayri “Diosqa atiy” nispa. Kamachiyninta munakuypi sayachisqanrayku, Payman qayllaykuyta munanchej.
Jehovaqa, mana uj sajra Kamachejchu, ni pitapis payta sirvinanpaj tanqanchu. Astawanpis Payqa, tukuy sonqo munakusqanchejrayku sirvinanchejta munan. Chaytataj runaj kausaynin qallarisqanmantapacha rikucherqa. Chantapis jinata sirvispaqa, Kamachejninchej kananta munasqanchejta rikuchinchej. Chaytataj cheqan kajman jina, munakuywantaj kamachisqanta yachasqanchejrayku ruwanchej.
Jehovaqa Adanta, Evata ima kasukunankupaj tanqananmantaqa, ajllanankuta saqerqa. Sichus paykuna Jehovata munakunkuman karqa, tukuy ruwasqantataj jatunpaj qhawankuman karqa chayqa, Satanasta mana kasunkumanchu karqa.
Aswan qhepaman, wañunan qayllata Moisés israelitasman nerqa: “Ñawpaqeykichejpi churani kawsayta, allin kajtawan; chantá churallanitaj wañuyta, mana allin kajtawan”, nispa (Deu. 30:15). Runasqa imaynatachus kausayta munasqankuta ajllayta aterqanku. Josuepis kikillantataj nerqa: “Sichus Tata Diospa nisqanta mana ruwayta munankichej chayqa, kunampacha ajllakuychej pitachus sirvinaykichejta”, nispa. Israelitastaj kuticherqanku: “Amapuni jaykʼajpis Tata Diosqa saqewachuykuchu waj dioskunata sirvejtaqa”, nispa (Jos. 24:15-17). Noqanchejpis kikillantataj ninchej. Jehovata munakusqanchejrayku, manapuni “jaykʼajpis” paymanta karunchakusunchu.
Cristianosqa, imatachus ruwayta ajllayta atisqanchejta yachanchej. Ancianosqa yuyaychanawanchejpaj, cheqan ñanman kutirichinawanchejpaj ima, kamachisqa kanku. Chaywanpis mana kausayninchejpi satʼikunkuchu, nitaj creeyninchejmanta patroneschu kayta munanku. Apóstol Pablo chayta nerqa: “Mana noqaykoqa creesqaykichejmanta patrones jinachu kayta munayku; astawanqa qankunata yanapayta munayku kusisqa kanaykichejpaj, imaraykuchus creeyrayku sinchʼita sayashankichej”, nispa (2 Cor. 1:24).
Imatapis munasqanchejrayku ruwanchej chayqa, mayta kusikunchej. Chayrayku Jehovaqa, payta munakusqanchejrayku, allin kajta ruwananchejta niwanchej. Pabloqa imaraykuchus chayta ruwananchejta jinata sutʼincharqa: “Tukuy kapuyniytachus wajchasman rakʼiyman, cuerpoytapis ninaman enqhaykusqa kanampaj jaywaykuyman mentasqa kanayrayku, manataj munakuyniyoj kayman chayqa, ni imapi yanapawanmanchu”, nispa (1 Cor. 13:3).
Kay tiempopipis may chhika cristianos, Jehovata tukuy sonqo munakusqankurayku sirvishanku. Chaytaj Jehovata mayta kusichin, jatunchantaj.
Jehovaqa tukuy kamachisninta mayta munakun. Qankunatapis wawas, waynuchus, sipasitas. Imajtinchus Jehovata munakusqaykichejta rikuchinkichej, manataj kay pachaj imasnintachu. Noqaykupis sonqomantapacha qankunata munakullaykutaj (Luc. 12:42, 43).
Qayna wataqa, Jehovata munakusqaykichejrayku qankuna —hermanos, hermanas, jóvenes ima— 1.748.697.447 horasta runaman willamorqankichej. Jallpʼantinpitaj 7.782.346 willajkuna karqa. Chantapis 268.777 hermanos, ashkha jóvenes ima Jehovaman qokuspa bautizakusqankumanta, ¡mayta kusikunchej! Sapa semana, 5.168 runas bautizakunku. ¡Chaymá jatun kuseyqa!
Kay qhepa pʼunchaykunapi, Diospa Llajtanpi kajkunaqa, ashkha chʼampaykunapi rikukunchej. Wakenqa onqoykunchej, chayri llakiypi kanchej, wakintaj qhatiykachasqa kanchej, chayri machuyasqanchejrayku ñakʼarinchej. Chaywanpis ama “llawchʼiya[na]chu”, nitaj qhepaman “kutiri[na]chu”. ¡Maytapuni qankunata munakuyku! (Heb. 10:39; 2 Cor. 4:16.)
Hermanosniykichej,
Diospa Llajtanta Kamachejkuna
[5-8 paginaspi tabla]
JEHOVAJ TESTIGOSNIN 2012 WATAPI RUWASQANKUMANTA WILLAYKUNA
(Publicacionpi qhawariy texto originalta)
2011 watapi septiembre killamanta 2012 watapi agosto killakama, Jehovaj testigosnenqa 184 millones dolaresta gastanku, precursores especiales, misioneros, superintendentes viajantes ima, ruwayninkuta juntʼanankupaj. Tukuy Sucursalespi 21.612 sirvinku. Tukuyninkutaj Orden Mundial de Siervos Especiales de Tiempo Completo de los Testigos de Jehová nisqamanta kanku.
Tukuy pachantinpi Señorpa Cenanpi mikhojkuna: 12.604
[9, 10 paginaspi sutʼinchaynin]
Qhelqanapaj