Profetasmanta yachaqakuna: Jonás
1. ¿Ima kʼacha kaykunasniyojtaj Jonás karqa?
1 Profeta Jonasmanta uyarispa, ¿imataj yuyayninchejman jamun? Wakenqa, manchali chayri rumi sonqo kasqanta yuyanku. Chaywanpis Jonasqa, llampʼu sonqo, mana manchachikojtaj karqa, wajkunaj allinninkutapis maskʼaj. ¿Imatá paymanta yachaqakusunman? (Sant. 5:10.)
2. ¿Imaynatataj Jonás jina llampʼu sonqo kasunman?
2 Llampʼu sonqo. Jonasqa, Niniveman kachasqa kajtin, waj ladoman ayqerqa. Ayqesqantaj mana pisipajchu karqa. Asiriosqa, may sajras kasqankumanta rejsisqa karqanku. Chantapis Niniveqa, “runa chʼallpa, yawar jichʼaj llajta” sutichasqa karqa (Nah. 3:1-3). Chaywanpis Jehovaqa, Jonaspa pantasqanta reparacherqa, watejmantataj Niniveman kacharqa. Paytaj llampʼu sonqowan kasukorqa (Pro. 24:32; Jon. 3:1-3). Qallariypi mana kasukojtinpis, Jonasqa Diospa munayninta ruwarqa (Mat. 21:28-31). Noqanchejrí, juchanchejrayku kʼamisqa kajtinchej chayri llajtanchejpi mana willayta atikullajtinpis, ¿willallasunpunichu?
3. ¿Imaraykú willanallapajpuni mana manchachikoj, wajkunaj allinninkuta maskʼaj ima kana tiyan?
3 Mana manchachikoj runa, wajkunaj allinninkutataj maskʼaj. Jonasqa, Tarsisman ayqeyta munasqanrayku, barcopi kajkunaj kausayninkuta wañuy pataman churarqa. Chayta reparaspataj, mama qochaman wijchʼuchikorqa (Jon. 1:3, 4, 12). Aswan qhepaman, Diospa kamachisqanta juntʼashaspa, Nínive llajtaj chaupinkama yaykorqa, ichá Jehovaj juiciosninta tukuy uyarinankupaj jina willananrayku. Manchali kaspaqa, mana chayta ruwanmanchu karqa (Jon. 3:3, 4). Noqanchejpis kay sajra pachapi willanallapajpuni, Dios kallpachanawanchejta mañakuna (Hech. 4:29-31). Chantapis willaypi tiemponchejta, kapuwasqanchejta ima churanapajqa, wajkunaj allinninkuta maskʼana tiyan (Hech. 20:24).
4. ¿Imaraykutaj cheqa sonqo profetaspa ruwasqankupi tʼukurinanchej tiyan?
4 Diospa profetasninmanta leeshaspa, paykunapis kasunman jina yuyana. Tapurikunataj: “¿Imatá noqa ruwayman karqarí? ¿Imaynatá kausayniypi paykuna jina ruwayman?”, nispa (Heb. 6:11, 12). Kay Reinomanta Willayninchejmantapacha, imatachus waj cheqa sonqo profetasmanta yachakuyta atisqanchejta sutʼinchakonqa.