Diospa Llajtanta Kamachejkunaj cartanku

Munasqa hermanos, hermanas:

Kay wata qallariypi kay cartata qhelqamusqaykumanta mayta kusikuyku. Niraj kay 2014 wata tukukushajtin pachaj watasña kanqa, Jesús enemigosninpa chaupinpi kamachiyta qallarisqanmanta (Sal. 110:1, 2)

Kay Watch Tower Bible and Tract Society of Pennsylvania nisqamanta, watapi uj kuti tantakuy 5 octubre killapi ruwakorqa. Chaypitaj Traducción del Nuevo Mundo nisqa Bibliata tijrachej Comisionqa, inglés parlaypi aswan sumaj Bibliata orqhorqa, ashkha runaspaj. Jehovaqa, 60 watas kurajtaña espirituwan ajllasqa wawasninnejta Traducción del Nuevo Mundo nisqa Bibliata orqhocherqa (Rom. 8:15, 16). Chayraykutaj chay Bibliaqa, may sumajpuni.

Diospa Llajtanta Kamachejkunamanta Qhelqajkunapaj Comisionqa, may chhika watastaña llankʼan Bibliata orqhokunanpaj. Kay tiempopeqa, Traducción del Nuevo Mundo Bibliata, tukuyninta chayri wakillanta 121 parlaykunapi orqhokun. Kapususqaykichej Bibliamanta, Jehovaman agradecekusqaykichejta rikuchiychej. Sapa día leerispa tʼukuriychej, ajinamanta Jehová Diosman astawan qayllaykunkichej (Sant. 4:8).

Wakin hermanosninchej ñakʼariypi rikukusqankumanta llakikuyku. Chayraykutaj mana wajkunawan khuska kusirikuyta atisqankutapis entiendeyku. Sutʼincharinapaj, Asiapi uj hermana jinallamanta ni imanta kuyurichiyta aterqachu, familiantaj llakiypi rikhurerqa. Chaymanta yachaj doctorespis, ni imata ruwayta aterqankuchu, ¡llakiy karqa! Kunanqa, qosan diantinta qhawanan tiyan, qhari wawan iskay warmi wawasninwantaj, munakuywan paykunata yanapanku. Kay sumaj familia jina, qankunapis llakiykunapi sinchʼita sayaspa, kusiyta tarinkichej, creeyniykichej pruebaman churasqa kajtin (Sant. 1:2-4). Ajllasqa cristianosmanta chayri waj ovejasmanta kajtinchejpis, Jehovaqa niwanchej, llakiykunata atipasqanchejmanta aswan qhepaman kusikunanchejta. Imaraykuchus wiñay kausayta qospa bendeciwasun (Sant. 1:12).

Kay 2013 watapi Jesuspa Wañuyninta Yuyarinapaj tantakuyman 19.241.252 runas jamorqanku. Chay tantakoyqa Diospa llajtanpaj may sumajpuni. Chayrayku chay chhika runas Jehovata, Jesucristota ima jatunchanankupaj jamusqankoqa, mayta kallpachawayku. Chantapis kay marzo, abril killaspi 2 millones kuraj precursores auxiliares karqanku. Chaytaj, Jehová Diosta jatuncharqa. Chantapis pikunachus precursores auxiliares kajkuna, qotuchakuykunata waturej hermano waturejtin, precursorespa tantakuypi horantinta qhepakuyta atinku, mana marzo chayri abril killapi kajtinpis. Chaytaj mayta kusichillawaykutaj. Diosta yupaychaypi allin sayasqa hermanosqa yachanku, runasman willanankupaj chantá Diosta yupaychaypi waj ruwanaspi tiemponkuta churasqanku, mana qhasipajchu kasqanta. Chaytaj sinchʼillatapuni sayanapaj yanapawasun, Kuraj Supay creeyninchejta llauchʼiyachiyta munasqanta, pantachiyta munawasqanchejta atipanapaj ima (1 Cor. 15:58).

Chantapis 2013 watapi 277.344 runas Diosman qokuspa bautizakorqanku, kunantaj Jallpʼantinpi kaj hermanoswan khuska kausayman pusaj ñanpi kashanku (Mat. 7:13, 14). Chay hermanosninchejqa, ‘creeypi kallpachasqas’ kanankupaj, yanapananchejta necesitanku (Col. 2:7). Kay pacha tukukunankama sinchʼita sayanapaj yanapanakunallapuni (Mat. 24:13). Biblia niwanchej: ‘Manchalistapis yanapananchejta, pisi kallpastapis kallpachananchejta, tukuypajtaj pacienciayoj kananchejta’, nispa (1 Tes. 5:14). Chantapis Diosmanta mañakunallapuni “Reinoyki jamuchun”, nispa (1 Tes. 5:17; Mat. 6:10).

Anuario nisqa librota kusiywan leerinaykichejta suyayku, sapa ujniykichejtataj, pikunachus Jehovata munakunkichej, ¡mayta munakuyku!

Hermanosniykichej,

Diospa Llajtanta Kamachejkuna