CRISTIANO KAUSAYNINCHEJ

Cristiano Kausayninchej tantakuypaj mosoj yanapas

Enero de 2018 watamantapacha Cristiano Kausayninchej tantakuypi, rikhurenqa notas de estudio, multimedia ima. Chaytaj orqhosqa kanqa kay Mosoj jallpʼapi kausajkunapaj Diospa Palabran estudianapaj (nwtsty) nisqa Bibliamanta, kay Biblia parlayninchejpi manaraj kajtinpis. Kay yanapasqa tantakuypaj sumajta wakichikunapaj yanapawasun. Mana chayllachu astawanqa munakuyniyoj, may yachayniyoj Jehová Dios Tatanchejman astawan qayllaykunapaj yanapawasun.

NOTAS DE ESTUDIO

Kay notaspeqa rikhurin Bibliapi wakin lugaresmanta costumbres, mapas, chay lugarespi ima qallustachus parlakusqan ima.

Mateo 12:20

Linomanta qʼoshñishaj mecha: Wasispi mecherosta kʼanchachikunankupajqa tʼuru platospi jina olivo aceiteta churaj kanku. Aceiteta mecha chʼonqasqanraykutaj kʼanchallajpuni. Griego parlaypi “qʼoshñishaj mecha” nispaqa, ichapis ñakʼayllataña kʼanchashaj mechamanta chayri kʼoshñishaj mechamanta parlashan. Isaías 42:3 profecía nisqanman jina Jesusqa khuyakuyniyoj kanan karqa, llampʼu sonqo runasta, llakiypi rikukojkunata yanaparinanpuni karqa.

Mateo 26:13

Cheqatapuni niykichej; cheqamantapuni niykichej: Griogopi amén palabraqa hebreopi amén palabramanta tijrachikun, chaytaj niyta munan “ajina kachun” chayrí “ajinapuni”. Jesusqa sapa kuti chayta oqharej imamantapis yachachinanpaj, uj suyakuymanta, chayri uj profeciamanta parlananpaj. Ajinamanta rikucherqa parlasqanqa cheqapuni, atienekunanpaj jinataj kasqanta. Yachakusqanman jina Jesuslla kay jinamanta “amén” nisqa palabrata oqharej. Juanpa qhelqasqanpeqa ashkha kutista amén amén nisqa palabra rikhurin, chaytaj tijrachikun “cheqamantapuni niykichej” nisqaman (Jn 1:51).

MULTIMEDIA

Kaypeqa rikhurin Bibliapi imamantachus parlashasqanman jina fotos, kikinchaykunas, videos, dibujosniyoj videos ima.

Betfagué, Olivos orqo, Jerusalén ima

Kay videopeqa rikukun Jerusalenman rej ujnin ñan. Chay ñanqa et-Tur llajtanta pasashan Olivos orqoj aswan patanejninkama. Et-Tur llajtaqa ichapis Betfagué llajtallataj kashan, mayqenmantachus Biblia parlan. Betaniaqa, Betfaguej inti llojsimuynin ladopi kashan, olivos orqoj ujnin ladonpi. Jesús discipulosninwan Jerusalenman rishaspa wakin chʼisis Vetaniapi alojakoj kanku. Chay lugarpi kunanqa el-Ázariyeh (El Éizariya) llajta kashan, chay suteqa árabe parlaypi, chaytaj niyta munan “Lázaroj lugarnin”. Chayrayku nisunman Jesusqa Marta, Mariaj, Lazaroj wasinkupipuni alojakusqanta (Mt 21:17; Mr 11:11; Lu 21:37; Jn 11:1). Jesusqa Lazaroj wasinmanta Jerusalenman rinanpaj, ichapis chay videopi rikukoj ñannillantataj rej. Kay 33 watapi 9 de nisán pʼunchaypi, Jesusqa uj maltón burropi Olivos orqonta pasaspa Jerusalenman yaykorqa, ichapis payqa rerqa Betfaguemantapacha.

Betaniamanta Betfagueman ñan
Betfagué
Olivos Orqo
Cedrón wayqʼo
Temploj Orqon

Uj clavo pasashan chaki talon tulluta

Kay fotopi rikukun uj runaj chaki talonninmanta tullun. Chay tullutaqa uj clavo 11,5 centimetrosniyoj pasashan. Kaytaqa tarikusqa 1968 watapi Jerusalén llajtaj ujnin ladonpi, chaytaj romanospa tiemponmanta kasqa. Kay tarikusqanqa rikuchiwanchej ichapis ñaupa tiempopi runasta castigaspa rakhu kʼaspiman clavasqankuta. Ichapis chay karqa romano soldados Jesusta clavarqanku chay jina clavosllataj. Chayta tarikorqa rumimanta ruwasqa kajaspi jina (osario), chay cajaspeqa wañusqa runaspa tullusninta jallchʼaj kanku. Kayqa rikuchiwanchej ñaupa tiempopi rakhu kʼaspipi wañuchisqa kajkunata pʼanpayta atikusqanta (Mt 27:35).