¿Imatá runas ninku orakuymanta?
MARÍA nin: “Orakuspaqa reparani Dios ladoypi kashasqanta. Makiymanta japʼishawasqanta. Yanapashawasqantataj chinkasqa jina kashajtiy”, nispa.
RAÚL nin: “Señorayqa 13 watastapuni cancerwan ñakʼarerqa chantá wañuporqa. Sapa día Diosman orakoj kani. Paytaj ajina llakisqa kashajtiy uyariwarqa. Sonqoytaj tiyaykorqa”, nispa.
ARNE nin: “Oracionqa Diospa sumaj regalon”, nispa.
María, Raúl, Arne, waj runas ima oraciontaqa uj regalota jina qhawanku. Reparankutaj orakuspaqa Dioswan parlayta atisqankuta, agradecekuyta atisqankuta, yanapantataj maskʼayta atisqankuta. Paykunaqa creenku Bibliapi oracionmanta parlasqanqa cheqapuni kasqanta. “Kaymin Diospi atienekusqanchejqa: Imatapis munayninman jina mañakojtinchejqa, pay uyariwanchej” (1 Juan 5:14).
Ashkha runastaj mana creeyta atillankuchu Biblia imatachus orakuymanta nisqanta. Orakuymanta parlaspa Steve nin: “17 watasniyoj kashajtiy kinsa amigosniy wañuporqanku. Ujqa autopi accidentakuspa wañorqa, iskaytaj jatun qochapi ahogakuspa”, nispa. ¿Imatá ruwarqa Steve? Pay nin: “Tukuy ima pasasqanmanta Diosman orakorqani. Jinapis Diosqa mana uyariwarqachu. Chayrayku nerqani: ‘Qhasillasina orakoyqa’”, nispa. Ashkha runaspis kikillantataj yuyanku, ninkutaj orakusqankoqa qhasilla kasqanta.
Chantapis runasqa waj imastawan ninku orakuy qhasilla kasqanta yuyaspa. Wakenqa ninku Diosqa tukuy imata yachasqantaña, ima problemasniyojchus kasqanchejta, imatachus necesitasqanchejta ima. Chayrayku manaña imatapis Diosman willakuyta munankuchu.
Wakintaj yuyanku Dios mana uyariyta munasqanta, ñaupajta mana allin imasta ruwasqankurayku. Jenny nin: “Noqaqa ni imapaj valesqayta yuyani. Mana allin imasta ruwasqaymanta mayta pesachikuni. Nipuni creenichu Dios mañakojtiy uyarinawanta”, nispa.
Qanrí, ¿chay runas jinallatajchu orakuymanta yuyanki? Ajinallatataj yuyanki chayqa, Biblia imatachus orakuymanta nisqan yanapasonqa. Bibliaqa orakuymanta sumajta sutʼinchan.a Chayrayku Bibliaqa kay tapuykunata yachanaykipaj yanapasonqa:
¿Dios orakojtinchej uyarinpunichu?
¿Imaraykutaj wakin runaspa mañakusqankuta mana uyarinchu?
¿Imaynatataj orakunanchej tiyan Dios uyarinawanchejpaj?
¿Imaynatataj orakuy yanapawasunman?
a Bibliapeqa tarisunman Diospa ashkha kamachisninpa mañakuykunasninkuta, Jesucristoj mañakusqantapis. Antiguo Testamentollapi 150 kuraj mañakuykunapuni tiyan.