Uj tapuysitullata ruwajtinchej allin riwasunman

Maypichus Marywan qosan Johnwana tiyakunku chay suyumanqa ashkha filipinos trabajaj rinku, Marywan qosanwantaj paykunata predicarinku. Coronavirus onqoy kashajtin, Maryqa ashkha runasta Bibliamanta yachachiyta qallarerqa, nitaj suyunpi tiyakojkunallatachu, manachayqa waj suyuspi tiyakojkunatapis. ¿Imaynatá paykunata estudiachiyta qallarerqa?

Maryqa estudiosninta tapurej: “¿Pillatapis rejsinkichu Bibliata estudiayta munajta?”, nispa. “Arí rejsini” nejtinkutaj, “presentariway” nej. Chaysitullata tapurisqanrayku ashkha kutispi allin rerqa. ¿Imarayku? Imaraykuchus Diospa Palabranta jatunpaj qhawaj runasqa yachakusqankuta willariytapuni munanku familiaresninkuman, amigosninkuman ima. Imaynachus Maryta risqanmanta parlarina.

Jasmin sutiyoj estudionqa Bibliamanta yachakuyta munaj runasta tawata rejsicherqa. Ujnenqa Kristine karqa, Bibliata estudiay maytapuni gustasqanraykutaj semanapi iskay kutita estudiachinanta nerqa. Marytaj payta tapurerqa Bibliamanta yachakuyta munajkunata resisqantachus manachus. Kristinetaj nerqa: “Arí, amigasniyta rejsichisqayki”, nispa. Uj mashkha semanasllapi tawa amigasnintapuni rejsicherqa, paykunataj Bibliata estudiayta munarqanku. Aswan qhepaman Kristineqa wajkunatawan rejsicherqa, paykunamanta wakintaj wajkunatawan rejsichillarqankutaj.

Kristineqa Maryman amigasninta rejsichiytawan, munallarqataj Filipinaspi familian Bibliamanta yachakunankuta. Chayrayku wawan Andreawan parlarerqa. Qallariypi Andreaqa yuyarqa: “Testigosqa sectalla kanku. Mana Jesuspi creenkuchu, chantapis Ñaupa Testamentollata valechinku”, nispa. Chaywanpis uj kutita estudiaspallaraj repararqa pantasqata yuyashasqanta. Bibliata estudiasqanpi mosoj imasta yachakuspa niyta yachaj: “Biblia nin chayqa, ajinapuni ari”, nispa.

Tiemponmantaj Andreaqa iskay amigasninta, trabajomanta uj compañerantawan Maryman rejsicherqa, paykunapis Bibliata estudiayta qallarillarqankutaj. Chantapis Andreajtaqa uj tian karqa, Angela sutiyoj. Payqa cieguita karqa, Bibliata estudiasqankutataj uyariyta yachaj Mary mana yachanallanta. Uj diataj Angelaqa Andreata nerqa Maryta rejsichinanta, paytapis estudiachinanta munasqanrayku. Angelamanqa maytapuni gustarqa Bibliata estudiay. Chayrayku niraj killanman ashkha textostaña de memoria yacharqa, chantapis semanapi tawa kutita Bibliata estudiayta munarqa. Andreaj yanapayninwan tantakuykunata uyarillajpuni videollamadanejta.

Kristine Bibliata estudiashajtin, qosan Joshuaqa chay chayllapi kaj estudiasqankuta uyarinanpaj. Chayta reparaytawantaj Maryqa tapurerqa Bibliata estudiayta munasqantachus manachus. Paytaj kuticherqa: “Ya, pero uyarillasaj. Ama imatapis tapuwankichu, manaqa ripusaj”, nispa. Niraj 5 minutosninmantaj payraj ashkha imasta taporqa Kristinemanta nisqaqa, nerqataj Bibliata estudiayta munallasqantataj.

Mary uj tapuysitullata ruwasqanrayku ashkha runas Bibliata estudiayta qallarerqanku. Wakin estudiosnintataj waj hermanosman, hermanasman ima pasaporqa. Tukuyninpeqa tawa suyusmanta 28 runaspuni Marywan Bibliata estudiayta qallarerqanku.

Ñaupaj estudion Jasminqa 2021 watapi abril killapi bautizakorqa. Kristineqa mayo de 2022 watapi bautizakorqa, kunantaj watejmanta Filipinaspi tiyakun familianwan khuska. Waj iskay estudiospis bautizakullarqankutaj, pikunatachus Kristine Maryman rejsicherqa chaykuna. Angelaqa uj mashkha killasnillanman bautizakorqa, kunantaj precursora regular jina sirvishan. Kristinej qosan Joshua, wawan Andreapis, chay ujnin estudiospis sumajta ñauparishanku.

Ñaupa cristianospa tiemponkupipis sumaj willaykunata japʼikojkunaqa, yachakusqankuta chay rato willarqanku familiaresninkuman, amigosninkuman ima (Juan 1:41, 42 qallariynin; Hech. 10:24, 27, 48; 16:25-33). ¿Nichu qanpis estudiosniykita, Diospa Palabranmanta yachakuyta munajkunatapis tapuriwaj: “¿Pillatapis rejsinkichu Bibliata estudiayta munajta?”, nispa? Chaysitullata tapurejtiyki ichapis ashkha runasman Bibliamanta yachachiyta qallarinki.