¿Yacharqankichu?
Jerusalén templopi altarpi wañuchisqanku animalespa yawarninkuta, ¿imanajtaj kanku sacerdotes?
SACERDOTESQA sapa wata may chhika animalesta temploj altarninpi ñakʼaj kanku. Ñaupa tiempomanta Josefo sutiyoj judío nisqanman jina, Pascua pʼunchayllapiraj 250.000 corderosmanta astawan ñakʼaj kanku. Chayrayku may chhika yawartapuni jichʼaj kanku (Lev. 1:10, 11; Núm. 28:16, 19). ¿Imanajtaj kanku chay chhika yawarwan?
Ñaupa tiempo imasta estudiajkunaqa, Herodespa templon karqa chayta allasqanku. Chay temploqa 70 watapi thuñisqa kanankama karqa. Chayta allaspataj yawar templomanta jawaman llojsinanpaj jina sumaj ruwasqa juskʼuta tarisqanku.
Chay tarisqanku juskʼumanta iskay imasta ukhuncharina:
Altar urapi juskʼus. 200 watamanta qhepataña qhelqasqa uj ñaupa libro, altarmanta jallpʼa ukhunta rej juskʼumanta parlan. Chay libroqa judiospa leyesninkumanta, costumbresninkumantawan parlan. Chay libropi nin altarpa ujnin kantunpi iskay ruwasqa juskʼus kasqanta. Chay juskʼusnintataj ofrendapaj jaywasqanku uywaspa yawarninkuwan, altarta mayllasqanku yakuwan khuska llojsisqanta, chay juskʼusninta rispataj Cedrón wayqʼokama chayasqanta.
Chay ñaupa libropi altarmanta jallpʼa ukhunta llojsej juskʼunmanta parlasqanqa, ñaupa imasta maskʼaj runaspa nisqankuman jinapuni kashan. The Cambridge History of Judaism nisqa libro nisqanman jina, templo qayllapi “jallpʼa ukhunta rej jatun juskʼuta” tarisqanku. Chay libropi nin: “Chay juskʼuntasina ofrendapaj jaywaj kanku chay animalespa yawarnin, altarta mayllaj kanku chay yakuwan khuska llojsej”, nispa.
Ashkha yaku karqa: Sacerdotesqa altartawan, yawar llojsinanpaj karqa chay juskʼutawan llimphuta japʼinankupaj may chhika yakuta necesitarqanku. ¿Maymantataj yakuta orqhoj kanku? Llajtamanta altarman yaku jamunanpaj larqʼas, yaku canales ima karqa. Chantapis yakuta jallchʼanankupaj estanques kallarqataj. Chayrayku yaku manapuni pisejchu. Ñaupa tiempo imasta estudiaj Joseph Patrich nerqa: “Ñaupa tiempomanta nisina mayqen templopis chay jina sumaj yakuyoj karqachu, nitaj llimphituta japʼinapaj chay jina sumaj ruwasqa juskʼusniyojpis”, nispa.