Leejkunaj tapuyninku
¿Maykʼajkamataj sumaj willaykunata willasunchej?
Jesús nerqa: “Diospa Gobiernonmanta sumaj willaykunapis jallpʼantinpi willakonqa tukuy naciones yachanankupaj, chaypachamá tukukoyqa jamonqa” (Mat. 24:14). Chay versiculopi, chantá 6, 13 versiculospi “tukukuy” palabra rikhurisqanqa griegopi nin télos nispa. Chay palabrataj oqharikun Satanaspa mundon Armagedonpi chinkasqata chinkachisqa kananmanta parlanapaj (Apo. 16:14, 16). Chayrayku sumaj willaykunataqa willallasunpuni Armagedón qallarerqonanpajña kashanqa chaykama. Chaytaj imaynatachus ñaupajta entiendesqanchejmanta mosoj sutʼinchay kashan.
Kunankamaqa entiendej kanchej Jatun Babilonia chinkachisqa kanankamalla, manchay ñakʼariy qallarinankamalla predicananchej kasqanta (Apo. 17:3, 5, 15, 16). Chantapis yuyaj kanchej manchay ñakʼariy tiempo qallarejtin “Jehová Dios llampʼu sonqoyojkunata khuyakunan wata” tukukapunanta (Isa. 61:2). Yuyallajtaj kanchej manchay ñakʼariy tiempo qallarinankama Jehovata tukuy sonqo sirvejkunalla manchay ñakʼariy tiempopi salvakunankuta. Chay salvakojkunatataj kikinchaj kanchej 607 watapi Jerusalén thuñisqa kashajtin salvakorqanku chay judioswan. Chay judiosqa ñaupajmantaña marcasqa karqanku Jehovata yupaychasqankurayku, sajra kajtataj chejnikusqankurayku (Eze. 5:11; 9:4). Jinapis ajinata entiendesqanchejqa mana Jesús nisqanman jinachu karqa. Payqa Mateo 24:14 versiculopi entiendecherqa, ichapis runasqa sumaj willaykunata japʼikuyta atinankutaraj, Armagedón qallarerqonanpajña kashanqa chaykama.
Mateo 24:14 versiculomanta mosoj sutʼinchayqa, cambiallantaj imaynatachus Apocalipsis 16:21 versiculota entiendesqanchejta. Apocalipsispeqa parlan jatuchaj granizos urmamusqanmanta. Iskaynin textosta aswan sumajta ukhuncharispataj reparanchej, kikin willayllamantataj parlashasqankuta. ¿Imajtintaj chayta ninchej? Chayta aswan sumajta entiendenapaj apóstol Pabloj nisqan sumajta yanapawasunman. Pay nerqa “salvación ñanpi” kajkunapaj sumaj willaykunaqa “kausaypa sumaj qʼapaynin jina” kananta. Diospa enemigosninpajtaj mana sumaj willaykunachu kananta, manaqa “wañuypa qʼapaynin jina” kananta (2 Cor. 2:15, 16). ¿Imajtin? Chay sumaj willakuna sutʼiman orqhonqa mundonku sajra kasqanta, Satanaspa makinpi kasqanta, tumpamantawantaj chinkachisqa kananta. Chaynejta chay sumaj willaykunata chejnikonqanku (Juan 7:7; 1 Juan 2:17; 5:19). Chayrayku ninchej chay iskaynin textos kikin willaymanta parlasqankuta. Pero chay willayqa wakinpaj allin kanqa, wakinpajtaj mana.
Apocalipsis 16:21 versiculoqa nillantaj chay granizoqa “manchay sinchʼi” kananta. Chayqa ichapis niyta munan manchay ñakʼariy kashajtin predicación aswan sinchʼiraj kananta. Chayrayku Jehovaj sutenqa ni jaykʼaj jina aswan sumaj rejsisqaraj kanqa (Eze. 39:7). ¿Chay niyta munanchu Jatun Babilonia chinkachisqa kasqantawan wakin runaspaj sumaj willaykuna sumaj qʼapay jinaraj kananta? Ichapis ajina kanqa, ichá uyariyta munanqankuraj. Ichapis yuyarikonqanku chayri cuentata qokonqanku Jehovaj testigosnenqa may chhika watastaña llulla religiones chinkachisqa kananta willasqankuta.
Ajinallataj Egiptopi pasarqa Diosninchej chunka castigosta apachisqantawan. Jehová Dios Egiptopi “tukuy dioskunata” castigasqantawan, “waj llajtayoj ashkha runaspis” israelitaswan khuska rillarqankutaj (Éxo. 12:12, 37, 38). Ichapis chay runasqa, Moisés chunka castigosta willasqan juntʼakusqanta rikusparaj Jehovaj llajtanman ujchaykukorqanku.
Jatun Babilonia chinkachisqa kasqantawan, pikunachus Jehovaj ladonmanta churakojkunaqa, Cristoj hermanosninta yanapayta atenqankuraj kay jallpʼapiraj kashajtinku (Mat. 25:34-36, 40). Chayta ruwasqankurayku ovejas jinaraj qhawasqa kayta atenqanku. Chay oportunidadtaj kanqa Armagedón pʼunchay qallarerqonanpajña kashanqa chaykamalla, maypachachus kay jallpʼapi puchoj ajllasqa cristianos cielopi tʼinkankuta japʼenqanku chaykama.
Kay mosoj sutʼinchayqa sutʼita reparachiwanchej Jehová runasta mayta munakusqanta, maytataj khuyakusqanta. Arí, Jehovaqa “mana munanchu ni pi chinkachisqa kananta. Astawanqa munan tukuy arrepientekunankuta” (2 Ped. 3:9).