Diospa Llajtanta Kamachejkunaj cartanku

Munasqa hermanos, hermanas:

“Diosmanta mañakuspa, tukuyniykichejmanta Diosman graciasta qoykupuni qankunamanta yuyarikuspa. Dios Tatanchejpa ñawpaqempi mana saykʼuspa yuyarikuykupuni creesqaykichejpa ruwasqanmanta, munakuywan sinchʼita trabajasqaykichejmanta, Señorninchej Jesucristopi pacienciawan suyakusqaykichejmanta ima.” (1 Tes. 1:2, 3.) Kay textopi nin jinapuni noqaykupis qankunamanta yuyayku. Jehovaman mayta agradecekuyku qankunamanta, ruwashasqaykichejmanta ima.

Qayna wata Diospa Reinon ñaupajman rinallanpajpuni sinchʼita llankʼarqankichej creesqaykichejrayku ruwaspa, munakuywantaj trabajaspa. Qankunamanta ashkhas, imaymanamanta astawan yanapakorqankichej. Wakenqa suyuykichejpi chayri waj suyuman maypichus Reinomanta pisi willajkunalla tiyan chayman riporqankichej. Wakintaj ashkha runas tiyan chaypi willarqankichej. Ashkhastaj precursores auxiliares karqankichej Jesuspa Wañuyninta Yuyarinapaj tiempopi, qotuchakuykunata waturej hermano jamusqan killapi chayri 2014 wata agosto killapi. Atisqaykichejman jina Jehovapaj tukuy sonqo llankʼasqaykichejmanta mayta kusikuyku (Col. 3:23, 24). Mayta Diosman agradecekuyku creesqaykichejrayku ruwasqaykichejmanta.

Mayta agradecekullaykutaj “munakuywan sinchʼita trabajasqaykichejmanta” Diospa Reinon ñauparinanpaj wasista ruwaspa. Jehová Diospa llajtan astawan mirashasqanrayku chay wasistaqa necesitakunpuni (Isa. 60:22). Qayna watalla 8.201.545 willajkuna karqanchej, sapa killataj 9.499.933 runasman jina Bibliamanta yachacherqanchej. Chayrayku ashkha sucursalesta jatunchakunan tiyan chayri watejmanta ruwakunan tiyan, Tantakuna Wasispis necesitakullantaj. Chantá ashkha suyuspitaj Waj Parlayman Tijrachinapaj oficinas necesitakun, tijrachejkuna maypichus qallunkuta parlakun chaypi tiyakunankupaj, llankʼanankupajtaj.

Chayrayku, ¿imatá ruwasunman chaykunapi yanapakunapaj? Ichá ruwaysikoj risunman. Jinapis wasita ruwayta yachaspapis manapis tukuyninchej ‘kapuyninchejwan’ yanapasunman (Pro. 3:9, 10). Israelitasqa niraj Dioswan tinkukuna toldota ruwakushajtin imastachus necesitakusqanmanta ashkhataña qorqanku chayrayku willachikorqa amaña apanankuta (Éxo. 36:5-7). Biblia jinata nisqanqa sonqoykuta kuyurichin, yanapawaykutaj. Munasqa hermanos chay imaspi “munakuywan sinchʼita trabajasqaykichejmanta” Jehovaman agradecekullaykutaj.

Astawanqa sonqoykuta kuyurichin hermanosninchejpa muchusqanku, mana saykʼusqankutaj. Sutʼincharinapaj 1950 watamantapacha Corea del Sur nisqa suyupi Testigo jovenesqa unaypaj chayri pisi tiempollapaj wisqʼasqa kanku, mana kay pachaj imasninpi satʼikusqankurayku. Ashkha hermanostaj chay jinapi rikukunku. Ajinata muchusqankoqa creeyniykuta astawan kallpachan.

Eritrea suyupitaj kinsa hermanosninchej 20 watas kurajtaña carcelpi kashanku. Hermanastapis wawitasninkutawan wisqʼaykullarqankutaj mana ancha unaypajchu. Kacharichisqa kanankupaj tukuy imata ruwakojtinpis, kunankamaqa qhasilla. Jinapis hermanosninchejqa cheqa sonqollapuni kanku, sinchʼi chʼampaykunapi kaspapis. Noqaykutaj paykunapaj mañapuykupuni (Rom. 1:8, 9).

Qankunamanta ashkhastaj creeyniykichejrayku mana wisqʼasqachu kashankichej. Jinapis waj llakiykunapi rikukunkichej machituña kasqaykichejrayku, onqoyrayku, mana testigo familiaresniykichej churanakusqankurayku, waj llakiykunataj kasqanrayku, chaytataj ichá qankunalla yachankichej. Jinapis Jehovata sirvishallankichejpuni (Sant. 1:12). ¡Allinta ruwankichej! Chaymantapis Jehovaman agradecekullaykutaj.

Arí, “creesqaykichejpa ruwasqanmanta”, “munakuywan sinchʼita trabajasqaykichejmanta”, “pacienciawan suyakusqaykichejmanta” ima Jehovaman agradecekuyku, “imaraykuchus payqa kʼachamin” (Sal. 106:1). Mayta munakuyku, Jehovamantataj mañakuyku kallpachasunaykichejpaj, sayachisunaykichejpaj, bendecisunaykichejpaj ima, jinamanta Jehovata wiñaypaj sirvinaykichejpaj.

Hermanosniykichej,

Diospa Llajtanta Kamachejkuna