¿Israelpichu Armagedón guerra qallarenqa? | ¿Imatá Biblia nin?

Bibliapeqa mana ninchu uj lugarllapi Armagedón guerra kananta, manaqa nin mundontinpi kananta. Chay guerrapeqa mundontinmanta tukuy gobiernos Dioswan maqanakonqanku.

• Chay guerramanta parlaspa Bibliapi nin: “Chaykunaqa kanku supaykunaj willayninku, [...] Jallpʼantinmanta reyesman rinku, paykunata tantaykunankupaj guerraman, Tukuy Atiyniyoj Diospa jatun pʼunchayninpi kanqa chayman. [...] Chay reyestataj tantaykorqanku, hebreo parlaypi Armagedón nisqa cheqapi”, nispa (Apocalipsis 16:14, 16).

“Armagedón” palabraqa hebreo parlaypi Har Meghiddóhn nikun, chaytaj niyta munan ‘Meguidó orqo’. Meguidoqa uj llajta karqa ñaupa tiempomanta Israel nacionpi. Chayrayku wakin runas creenku Armagedón guerra Israel nacionpi kananta. Jinapis ‘jallpʼantinmanta reyes’ soldadosninkuwan khuska guerrapaj tantakunkuman chayqa, mana Meguidó lugar alcanzanmanchu, ni muyuyninpi kaj jallpʼaspis, nisunman Oriente Próximo nisqa jallpʼas.

Apocalipsis libroqa qhelqasqa kashan “señaleswan”, nisunman casi tukuy imata waj imaswan kikinchashan (Apocalipsis 1:1, sutʼinchaynin). Chayrayku Armagedonqa mana uj lugarchu. Astawanpis chay palabra oqharikun mundontinmanta tukuy naciones qhepa kaj guerrapi Diospa contranta maqanakunankumanta parlanapaj. Imajtinchus paykunaqa mana Diospa kamachiyninpi kayta munankuchu (Apocalipsis 19:11-16, 19-21).