¿Imatataj Biblia nin?
“Kaypi qhelqasqa kashan cieloj qallarikuyninmanta, kay jallpʼaj qallarikuyninmantawan, maypachachus ruwasqa karqanku chaymanta” (Génesis 2:4). Kay versiculoqa nishan jallpʼanchej ruwasqapuni kasqanta. ¿Bibliaj nisqan cientificospa nisqankuwan churanakunchu? Chaymanta parlarina.
Qallariypi: Cielo, jallpʼa ima ruwasqa karqa.
¿Cielopis jallpʼapis karqapunichu?
Génesis 1:1 nin: “Qallariypeqa Dios ruwarqa cielotawan jallpʼatawan”, nispa.
1950 watakama wakin may rejsisqa cientificosqa yuyarqanku jallpʼapis cielopis kasqantapuni. Jinapis kay tiempopi ashkha científicos astawan estudiasqankurayku ninku jallpʼapis cielopis ruwasqa kasqanta.
¿Imaynataj qallariypi Jallpʼa karqa?
Génesis 1:2, 9 nin qallariypi “jallpʼaqa mana imayoj chʼusajlla” kashasqanta, yakumanta juntʼataj.
Cientificospa nisqankoqa kay versiculoj nisqanman rijchʼakun. Patrick Shih sutiyoj científico jinata nin: “Qallariypeqa jallpʼapi mana oxígeno karqachu, nitaj samaytapis atikorqachu, laqhalla uj jinataj karqa”, nispa. Uj revistapis jinata nin: “Investigakusqanman jina jallpʼaqa yakumanta juntʼa kasharqa, chʼaki jallpʼataj casi manapuni karqachu”, nispa.
Jallpʼaqa laqhalla karqa
Génesis 1:3-5 nin kʼanchayqa jallpʼaman mana chay ratochu chayamusqanta, astawanpis intej, killaj kʼanchaynin jallpʼapi sutʼi rikukunanpaj unay tiempo pasarqa (Génesis 1:14-18).
Bibliaqa mana ninchu Jallpʼa sojta diasllapi ruwasqa kasqanta
Uj instituto nerqa: “Qallariypi kʼanchayqa jallpʼapi chharpulla karqa. Chantapis jallpʼapi neblina juntʼa karqa. Chay neblina chinkapojtintaj cieloqa azulman tukuporqa”, nispa.
¿Ujllapichu tukuy ima ruwasqa karqa?
Mana. Génesis 1:20-27 nisqanman jina challwasraj ruwasqa karqanku chantá pʼisqos chantá animales chaymantaraj runa. Cientificosrí, ¿imatataj ninku? Paykunaqa yuyanku challwasraj rikhurisqanta chantá animales, unayninmantaj runa.
Bibliaqa mana ninchu tiemponwan tukuy kausajkuna mana cambianankuta
¿Imastataj Biblia mana ninchu?
Wakin runasqa ninku Bibliaj nisqan cientificospa nisqanwan churanakusqanta. Chaytataj ninku Bibliata mana sumajta entiendesqankurayku.
Bibliaqa mana ninchu cielopis jallpʼapis 6.000 watasnillayoj kasqanta. Astawanpis nin qallariypi cielopis jallpʼapis ruwasqa kasqanta (Génesis 1:1). Bibliaqa mana ninchu maykʼajchus chay kasqanta.
Bibliaqa mana ninchu Jallpʼa sojta diasllapi ruwasqa kasqanta. Bibliaqa uj pʼunchaymanta parlaspa uj tiempomanta parlashan. Por ejemplo Bibliaqa nin Jehová Diosa kay jallpʼanchejta, chaypi kausajkunatawan uj pʼunchaypi ruwasqanta. Chay pʼunchaytaj ashkha wataswan ninakun (Génesis 2:4). Génesis capítulo 1 parlan sojta diaspi Diosninchej cielota, jallpʼata tukuy kausajkunatawan ruwasqanta. Chaytaj may chhika watas karqa.
Bibliaqa mana ninchu tiemponwan tukuy kausajkuna mana cambianankuta. Génesis libroqa nin tukuy animales “layankuman jina” ruwasqa kasqankuta (Génesis 1:24, 25). “Tukuy laya” palabraqa mana cientificospa churasqanku palabrachu. Astawanpis Biblia chayta oqharin tukuy laya rijchʼaj animalesmanta parlananpajsina. Chayrayku tiemponman tukuy laya animalesqa cambiayta atinkuman.
¿Ima ninkitaj?
Bibliaqa nin imaynatachus cielopis jallpʼapis ruwasqa kasqankuta, imaynachus jallpʼa qallariypi kasqanta ima. Nillantaj imaynatachus kausay qallarisqantapis. Bibliaqa chay imasmanta entiendenapaj jinalla parlan. Chantapis Bibliaqa chay imasta ruwajmanta willarillawanchejtaj. Chaymanta parlaspa uj revista nin: “Kausayqa mana jinallamantachu rikhurerqa. Cientificospis ajinallatataj ninku”, nispa (Encyclopædia Britannica).b
a Bibliaqa nin Diospa sutin Jehová kasqanta.
b Chay revistaqa mana ninchu kausayta Dios rikhurichisqanta.