¿IMATÁ RUWASUNMAN TUKUY IMAPIS VALEYKOJTIN?
Qorikuyta yachana
Precios wicharisqanrayku ichapis mana necesitasqayki imasta rantiyta atishallankichu. Chayrayku ichapis yuyawaj ni imata wajkunaman qoriyta atisqaykita. Jinapis qolqe pisiyajtin qorikuyta yachayqa mayta yanapawanchej. Qolqesitunchejqa wajkunaman qorinapajpis waqaychitanchejpajpis alcanzawasunman.
¿IMARAYKUTAJ QORIKUYTA YACHANA?
Wajkunaman imitallatapis qorejtinchejqa allin sientekunchej, kusisqastaj kanchej. Wakin doctores nisqankuman jina qorikuyta yachayqa yanapawanchej sanitos kanapaj, mana anchata llakikunapaj, corazonninchej allin kananpaj, miskʼita puñukunapajpis. Qorikuyta yachayqa nanaykunasninchejtapis pisiyachin.
Wajkunata qolqesitunchejwan chayri imaynitallamantapis yanapaytapuni yachachej chayqa, yanapata necesitashajtinchej wajkuna yanapanawanchejta saqellasun. Chaymanta parlaspa Inglaterramanta Howard nin: “Señoraywanqa qhawarishaykupuni imaynatachus wajkunata yanaparinaykuta, imastachus qorinaykutapis. Yanapata necesitajtiykutaj wajkunata yanapariwayku niyta atillayku”, nispa. Mana uj imata japʼinanchejraykuchu wajkunaman qorinchej, manaqa sonqomantapachapuni. Ajinata wajkunaman qorejtinchejqa paykunawan sumaj amigos ruwakusunman, yanapata necesitajtinchejtaj tukuy sonqo yanapawasun.
¿IMATÁ RUWAWAJ?
Kapususqaykimanta wajkunaman qoriy. Pisi imaslla tiyapusojtinpis wajkunaman imitallatapis qoriyta atiwajpuni, papa waykʼitullatapis. Duncanwan familianwanqa Ugandapi tiyakunku. Paykunaqa may pobres kaspapis qorikuytapuni yachanku. Duncan nin: “Domingosnenqa señoraywan khuska pillatapis wasiykuman wajyarikuykupuni imitallatapis mikhurikunaykupaj. Mayta gustawayku imitallatapis wajkunawan ruwayqa”, nispa.
Jinapis sumajta qhawarikuna wajkunaman qorisqanchejrayku ama familianchejman necesitasqanku imasta pisichinapaj (Job 17:5).
Kayta ruwawaj: Pillamanpis mikhunitata, refresquituta chayri teycituta qoriwaj. Chantapis imatachus manaña utilizankichu chayta amigoykiman chayri vecinoykiman jaywapuwaj, ichapis paykuna chaytapuni necesitashankuman.
Waj jinasmanta wajkunata yanapay. Wakin kutisqa wajkunata sumajta yanapanaykipaj mana qolqetapunichu necesitanki. Ichapis tiempochakuwaj wajkunata necesitasqanku imaspi yanaparinaykipaj, manaqa kʼacha palabraswan kallpachariwaj may munasqa kasqanta nispa.
Kayta ruwawaj: Wajkunata yanapawaj wasinkuta pichaysispa, arreglapuspa, chayri imatachus necesitasqankuta rantinpuspa. Ujnin amigoykimanpis uj cartitapi chayri uj mensajepi escribiwaj agradecekunaykipaj, chayri paymanta yuyarikusqaykita ninallaykipajpis.
Wajkunata tukuy imaymanamanta yanapanaykipaj kallpachakunki chayqa, aswan kusisqa kausakunki.