89 yachachiy
Jesús Diospa wasinta pichan
JESÚS may phiñasqa kaypi kachkan, ¿ichari? ¿Yachankichu imaraykuchus? Kay templopi kaq runasqa qullqita munapayanku. Diospa wasinman yupaychaq jamuqkunamanta achkha qullqita mañanku.
¿Chay waka uñasta, ovejasta, urpista ima rikunkichu? Kay runasqa Diospa wasinpi chay animalesta ranqhachkanku. ¿Imarayku chayta ruwanku? Imaraykuchus runaqa Diospa wasinman rispa uywasta chayri pʼisqitusta Diosman jaywaq kanku.
Pipis juchachakuspaqa Diospa leyninmanjina uywasta qʼulachinan karqa. Chantapis, wak kutipipis Diosman jaywanallankutaq karqa. Jina kaptinqa, ¿maymanta uywakunata runa urqhunman karqari?
Wakinpataqa uywasninku pʼisqitusninku ima karqa. Wakinkunapta mana imatapis uywaqchu kanku. Wakinkunataq Jerusalenmanta karupi tiyakusqankurayku, mana imatapis apamuqchu kanku. Chayrayku runakunaqa chaypi uywasta rantiq kanku. Kay ranqhirustaq, ancha achkhapi chay uywasta ranqhaq kanku. Jinamanta, suwakuq kanku. Chantapis, Diospa wasinpi ranqhaspaqa, mana allintachu ruwachkarqanku.
Jesús chayta rikuspa mayta phiñakurqa. Chayrayku payqa mesasta tikraspa, qullqita pampaman qhallarqa. Chantapis, juk siqʼunata ruwakuspa, Diospa wasinmanta uywasta wikchʼurqa. Chay urpi ranqhirustataq nirqa: ‘¡Kaykunata jawaman urqhuychik! Amañataq Tataypa wasinta, qhatu wasiman tukuchispa qullqichakuq jamuychikchu’, nispa.
Jesuswan puriqkunapis chaypi kachkarqanku. Jesús ruwasqanta rikuspataq, tʼukulla qhipakurqanku. Chanta Biblia nisqanta yuyarikurqanku: ‘Diospa wasinta munakusqanqa, ninajina kʼajarinqa’, nispa.
Jesús Jerusalenpi Pascuapi kachkaspa, achkha milagrosta ruwarqa. Chaymanta, Jesús Judeamanta Galileaman richkaspa, Samarianiqta rirqa. Qhawarina imatachus chaypi ruwarqa.