Juk sumaq suyakuy

Satanás, supaykuna ima, mana unaytawanñachu runata chʼawkiyanqanku, paykunaqa janaqpachamanta wikchʼuchikamunkuña (Apocalipsis 12:9). Diosqa, pisi tiempomantawan Satanasta supaykunata ima wañuchinqa. Apóstol Juan musquypijina rikusqanmanta, nirqa: “Ricurkanitaj uj angelta janajpachamanta uraycamujta, maquinpi abismoj llaventa uj jatun cadenatahuan japʼispa. Chai dragontataj japʼerka chai ñaupa serpienteta, maiken Supaymin, Satanastaj; huaranka huatasraicutaj paitaka huatarka, Abismomantaj huijchʼurka, paipa patanpi huiskʼaycuspataj sellaycurka, nacionesta amaña engañananpaj chai huaranka huatas tucucunan cama” (Apocalipsis 20:1-3, Mosoj Testamento). Kuraq Supay, supaykuna ima, wiñaypaq chinkachisqa kanqanku (Apocalipsis 20:10).

Chantá Dios, saqra runata chinkachillanqataq (Salmo 37:9, 10; Lucas 13:5).

¡Wañupuqkunaqa kawsarimunqanku!

Jehovaqa, Satanasta, supaykunata ima chinkachiytawan, kʼacha runasta bendecinqa. Yuyariy, wañupuqkunaqa mana kawsachkankuchu. Chayrayku Jesús, wañuyta, puñuywan kikincharqa (Juan 11:11-14). Imaraykuchus payqa, wañupuqkuna juk pʼunchay kawsarimunankuta yacharqa. Nirqataq: “Hora chayamonqa, chaypachataj tukuy pʼampasqa kajkunaqa [...] kawsarinponqanku”, nispa (Juan 5:28, 29; kay Hechos 24:15, kikinchay).

Wañupuqkunaqa, kay Jallpʼapi kawsakunankupaq kawsarimunqanku. Kunan pʼunchayqa pipis wañupusqanmanta willaykuna tiyan, paraisopitaq wañupuqkuna kawsarimusqankumanta willaykuna kanqa. ¡Aya pʼampanamanta, wañupuqkunata kawsarimuqta rikuyqa, may kusiychá kanqa!