2 Yachaqana
¿Pitaq Diosri?
¿Pitaq chiqa Diosri, imataq sutinri? (1, 2)
¿Imayna cuerpoyuqtaqri? (3)
¿Mayqinkunataq astawan kʼacha kayninkunari? (4)
¿Diosta yupaychanapaq lantikunata apaykachanachu kanman? (5)
¿Imaynamantataq Diosta riqsisunman? (6)
1. Runaqa tukuy imata yupaychan. Chaywanpis, Bibliaqa juk kʼata CHIQA Diosllata yupaychananchikta niwanchik. Pay tukuy imata janaqpachapi kay pachapipis ruwarqa, chayrayku payllata yupaychananchik tiyan (1 Corintios 8:5, 6; Apocalipsis 4:11).
2. Diostaqa tukuy imata sutichanku, chaywanpis juklla sutin, sutinqa: JEHOVÁ. Yaqha tukuy Bibliakunamanta Diospa sutinta urqhunku, chaypitaq Tata Dios, chayri Señor, nispa churanku. Biblia qillqakuchkaptinqa yaqha 7,000 kutita Jehová suti rikhuriq (Éxodo 3:14; Salmo 83:18, NM).
3. Jehovaqa mana ñuqanchikjina aychamantachu. Biblia niwanchik: “Diosqa Espiritumin”, nispa (Juan 4:24). Juk espirituqa mana runajinallachu, manaqa astawan atiyniyuq. Mana jaykʼaq, mayqin runapis Diosninchikta rikunchu. Chaywanpis, Jehovaqa janaqpachamanta tukuy imata qhawachkan (Salmo 11:4, 5; Juan 1:18). ¿Imataq santo espirituri? Mana juk runachu, manaqa Diospa kallpan, munasqanta juntʼananpaq (Salmo 104:30).
4. Bibliaqa Jehovap kayninmanta willawanchik. Diosninchik: munakuyniyuq, chiqan kayniyuq, yachayniyuq, atiyniyuq ima, kasqanta willawanchik (Deuteronomio 32:4; Job 12:13; Isaías 40:26; 1 Juan 4:8). Chantapis khuyakuq, kʼacha sunqu, llampʼu sunqu ima, kasqanta niwanchik. Kasukuq wawajina, payjina kayta munananchik tiyan (Efesios 5:1, 2).
5. ¿Lantikunaniqta Diosta yupaychanachu kanman? Mana (Éxodo 20:4, 5). Jehovaqa payllata yupaychananchikta niwanchik, mana imatapis yupaychananchikta munanchu. Astawanpis, lantikunaqa mana yanapayta atiwanchikchu (Salmo 115:4-8; Isaías 42:8).
6. ¿Imaynatá Diosta astawan riqsisunman? Qallarinapaq, tukuy ruwasqanta qhawarispa, imatachus paymanta yachachiwasqanchikpitaq tʼukurispa. Ruwasqanpiqa jatun atiyninta, yachayninta, munakuyninta ima rikunchik (Salmo 19:1-6; Romanos 1:20). Chantapis Diosta astawan riqsisunman, Bibliata ñawirispa. Chaypi imaynachus pay kasqanta, imatachus munasqanta ima willawanchik. Chantapis, imatachus ruwananchikta willallawanchiktaq (Amós 3:7; 2 Timoteo 3:16, 17).
[5 paginapi dibujos/fotos]
Ruwasqanta qhawarispa, Bibliata ñawirispa ima, Diosta riqsinchik