3 Yachaqana
¿Pitaq Jesucristori?
¿Mayqin churintataq Diosninchik ñawpaqta ruwarqa? (1)
¿Imaraykutaq Jesusta “Palabra” nispa sutichakun? (1)
¿Imaraykutaq Jesús Jallpʼaman jamurqa? (2-4)
¿Imaraykutaq milagrokunata ruwarqa? (5)
¿Imatataq Jesús qhipaman ruwanqa? (6)
1. Jesusqa manaraq Jallpʼaman jamuchkaptin, janaqpachapi espiritujina tiyakurqa. Diosninchik Jesusta tukuy imamanta ñawpaqta ruwarqa, chayrayku Jesusqa Diospa kuraq churin (Apocalipsis 3:14). Dioslla Jesusta ruwarqa, chayrayku Jesusqa Diospa kʼata churin. Chaymantataq Jehovaqa Jesusniqta, tukuy imata janaqpachapi, kay pachapipis ruwarqa (Proverbios 8:22-31; Colosenses 1:16, 17). Chantapis Diosqa Jesusniqta tukuy imata willarqa. Chayrayku, Jesusta “Palabra” nispa sutichakun (Juan 1:1-3; Apocalipsis 19:13).
2. Diosqa, Churinpa kawsayninta Mariap wisanman churaspa Jallpʼaman Jesusta kachamurqa. Jesuspa tatan mana juk runachu karqa, chayrayku payqa mana juchayuq juntʼa runa karqa. ¿Imapaqtaq Jesús Jallpʼaman jamurqa? 1) Diosmanta chiqa kaqta yachachinanpaq (Juan 18:37), 2) ñakʼarispapis mana Diosta wasanchananpaq, jinamanta kikinta ruwananchikpaq (1 Pedro 2:21), 3) kawsayninta ñuqanchikrayku qunanpaq, jinamanta juchamanta, wañuymanta kacharichiwananchikpaq. ¿Imaraykutaq wañunan karqari? (Mateo 20:28.)
3. Ñawpa runa Adanqa, Dios kamachisqanta mana kasukuspa ‘juchallikurqa’. Chayrayku Diosninchik Adanta wañunanta nirqa (Génesis 3:17-19). Adán juchallikusqanrayku, mana juchayuq, juntʼa runa kayninta chinkachirqa. Chayrayku pisimanta pisi, machuyaspa wañurqa. Adanqa tukuy mirayninman juchata saqiwanchik. Chayrayku machuyanchik, unqunchik, wañunchik ima. ¿Imaynatá chaykunamanta runata qhispichikunman karqa? (Romanos 3:23; 5:12.)
4. Jesusqa Adanjina mana juchayuq juntʼa runa karqa. Payqa mayta ñakʼarispapis mana Adanjina juchallikurqachu, tukuy imapi Diosta kasukurqa. Jinamanta Jesusqa mana juchayuq kawsayninwan Adanpa juchanta pagarqa. Chayrayku Biblia nisqanmanjina “preciowan kacharichisqa”, rantisqa, kanchik. Jinamanta tukuy Jesuspi iñiqkunaqa, wañuymanta, juchamanta ima, kacharichisqas kanqanku, wiñaypaqtaq kawsanqanku (Colosenses 1:14; Juan 3:16; Romanos 5:18, 19).
5. Jesusqa Jallpʼapi kachkaspa unqusqakunata jampirqa, yarqhasqa runata mikhuchirqa, jatun wayrakunata chinkachirqa, wañuqkunatapis kawsarichirqa. ¿Imaraykutaq chaykunata ruwarqa? 1) Ñakʼariq runata khuyakuspa yanapayta munasqanrayku. 2) Diospa churin kasqanta rikuchinanpaq. 3) Qhipaman Reyjina kamachichkaptin, imatachus kasukuq runakunapaq ruwananta rikuchinanpaq (Mateo 14:14; Marcos 2:10-12; Juan 5:28, 29).
6. Diosqa, Jesús janaqpachaman ripunanpaq wañuymanta angeltajina kawsarichimurqa (1 Corintios 15:44). Chaymantataq Jesusta Reytajina churan. Jesusqa tumpamantawan tukuy ñakʼariyta, saqra kaqta ima, chinkachinqa (Salmo 37:9-11; Proverbios 2:21, 22).
[7 paginapi dibujos/fotos]
Jallpʼapi kachkaspa, Jesús runata yachachirqa, milagrokunata ruwarqa, kawsaynintapis ñuqanchikrayku qurqa