4 Yachaqana

¿Pitaq Supayri?

¿Imaynatá Kuraq Supay, Satanás rikhurin? (1, 2)

¿Imaynamanta runata chʼawkiyan? (3-7)

¿Imaraykutaq Supaywan churanakunayki tiyan? (7)

1. “Supay” rimayqa, wakkunamanta saqra llullata parlay niyta munan. “Satanás” rimaytaq churanakuq chayri enemigo niyta munan. Kay sutikunaqa, imaynachus Supay kasqanta yachachiwanchik. Qallariypiqa kʼacha ángel karqa, janaqpachapi tiyakurqa. Chaymanta umanta uqharispa, runawan yupaychachikuyta munarqa (Mateo 4:8-10).

2. Kay ángel Satanasqa, Eva Diosta wasanchananpaq juk katariniqta llullakurqa. Satanasqa Diospa “kamachiyninwan”, Jatun kayninwan ima, churanakun. Jinamanta, mana allin kamachiq kasqanta nispa, mana runap allinninpaq kamachisqanta nispa, Diospa kamachiyninta iskaychachirqa. Chantapis, tukuy runa Diosta wasanchanqa nispa, nirqa. Chaykunata parlaspaqa, Diospa enemigonman tukun. Chaymantapacha, Kuraq Supayjina, Satanasjina riqsichikun (Génesis 3:1-5; Job 1:8-11; Apocalipsis 12:9).

3. Satanasqa, payta yupaychanankupaq runata chʼawkiyan (2 Corintios 11:3, 14). Chaytaqa llulla religionwan ruwan. Mayqin religionpis llullakunata Diosmanta yachachin chayqa, Satanaspa munayninta ruwachkan (Juan 8:44). Llulla religionpi kaqkunaqa Diosta yupaychasqankuta ninku, chaywanpis Satanás ‘kay pachap diosnin’ kasqanrayku Satanasllata yupaychachkanku (2 Corintios 4:3, 4).

4. Satanasqa layqakunawan runata chʼawkiyan. Wakinkunaqa, jarkʼakunapaq, wak runata ñakʼarichinapaq, chayri wañusqakunata tapunapaq layqakunaman rinku. Satanasqa tukuy layqakunata apaykachan. Diosta kusichiyta munanchik chayqa, tukuy layqakunamanta karunchakunanchik tiyan (Deuteronomio 18:10-12; Hechos 19:18, 19).

5. Satanasqa, jatunchakuywan, chantapis politicakunawan runata chʼawkiyan. Wakin runaqa, llaqtan chayri layan astawan sumaq kasqanta ninku. Chayqa mana jinachu (Hechos 10:34, 35). Wakinkunataq, politicokuna tukuy llakiykunata chinkachinqanku nispa, ninku. Jinamanta Diospa Reinonta wasanchanku. Chay Reinolla ñakʼariyninchikta chinkachinqa (Daniel 2:44).

6. Satanasqa, juchata munapayaywan runakunata pantachillantaq. Jehovaqa mana ñakʼarinanchikta munanchu, chayrayku juchamanta karunchakunanchikta niwanchik (Gálatas 6:7, 8). Wakinkunaqa paykunawan khuska juchallikunaykita munanqanku. Chaywanpis, Satanaslla chayta munasqanta yuyariy (1 Corintios 6:9, 10; 15:33).

7. Satanasqa, Jehová Diosta saqinaykipaq, ichapis runawan qhatichisunqa, churanachisunqa ima. Bibliata yachakusqaykirayku wakin familiaykimanta ichapis sinchita phiñakunqanku. Wakinkunataq asipayasunqanku. Yuyariy, ¿pitaq kawsayta qusunki? Satanasqa manaña Bibliamanta yachakunaykipaq, manchachikunaykita munan. Amapuni atipachikuychu (Mateo 10:34-37; 1 Pedro 5:8, 9). Supaywan churanakuspaqa, Jehovata kusichinki, kamachiyninwan kasqaykitataq rikuchinki (Proverbios 27:11).

[9 paginapi dibujos/fotos]

Llulla religionkuna, layqakuna, jatunchakuy ima, runata chʼawkiyan

[9 paginapi dibujo/foto]

Jehovamanta astawan yachakuspaqa, Satanaswan churanakunchik