6 Yachaqana
¿Imataq Diospa Reinonri?
¿Maypitaq Diospa Reinon kachkan? (1)
¿Pitaq Reynin? (2)
¿Wak Reykuna kanchu? Jina kaptinqa, ¿machkhataq kanku? (3)
¿Imataq qhipa pʼunchaykunapi kasqanchikta rikuchiwanchik? (4)
¿Imatataq Diospa Reinon qhipaman runapaq ruwanqa? (5-7)
1. Jesús Jallpʼapi kachkaspa, payta qhatiqkunaman Diospa Reinon jamunanta mañakuyta yachachirqa. Juk reinoqa juk reypa kamachiyninwan ninakun. Diospa Reinonqa sumaqta kamachimunqa. Chay Reinoqa janaqpachapi kachkan, chaymantapacha Jallpʼaman kamachimunqa. Diospa sutinta llimphuchanqa. Diospa munaynintataq kay pachapi janaqpachapijina ruwanqa (Mateo 6:9, 10).
2. Diosqa, Jesús Diospa Reinonpi kamachinanta nirqa (Lucas 1:30-33). Jesús Jallpʼapi kachkaspa, kʼacha, chiqan, mana pantaq runa kasqanta rikuchirqa. Janaqpachaman kutirispaqa, manaraq Diospa Reinonpi kamachiyta qallarirqachu (Hebreos 10:12-14). Jehovaqa Jesusta 1914 watapi kamachinanpaq churarqa. Chay watamantapacha Jesusqa Diospa Reinonpi kamachichkan (Daniel 7:13, 14).
3. Jehovaqa chiqa sunqu qharikunata, warmikunata janaqpachapi kamachinankupaq aqllallantaq. Paykunaqa Jesuswan khuska runata kamachinqanku, juzganqanku, sacerdotesjinataq kanqanku (Lucas 22:28-30; Apocalipsis 5:9, 10). Jesusqa paywan kamachiqkunata “juchʼuy tropa ovejitasniy” nispa suticharqa. Paykunaqa 144.000 kanku (Lucas 12:32; Apocalipsis 14:1-3).
4. Jesús kamachiyta qallariytawan, janaqpachamanta Satanasta, saqra angelkunatawan Jallpʼaman wikchʼumurqa. Chayrayku 1914 watamantapacha llakiykuna astawan yapakun (Apocalipsis 12:9, 12). Maqanakuykuna, yarqhaykuna, unquykuna, millay kawsaykuna, wak millay ruwaykuna imaqa, “señal” nisqa kanku. Jinamanta, Jesús kamachiyta qallarisqanta, qhipa pʼunchaykunapi kasqanchikta ima rikunchik (Mateo 24:3,7,8, 12; Lucas 21:10, 11; 2 Timoteo 3:1-5).
5. Jesusqa runata juchanmanjina juzganqa, michiq runajina cabrakunamanta ovejakunata aqllanqa. ‘Ovejakunaqa’, tukuy sunquwan Jesús kamachisqanta kasukuqkuna kanku, paykunaqa wiñaypaq kay Jallpʼapi tiyakunqanku. ‘Cabrakunataq’ Diospa Reinonta qhisachaqkuna kanqanku (Mateo 25:31-34). Jesús tumpamantawan cabrajina runakunata chinkachinqa (2 Tesalonicenses 1:6-9). Jesuspa “ovejan” kayta munaspaqa, Reinomanta willaykunata kasukunayki tiyan, chaymanjinataq ruwanayki tiyan (Mateo 24:14).
6. Jallpʼaqa achkha suyukunapi tʼaqasqa kachkan, sapa suyupiqa juk kamachiq tiyan, paykunapurataq maqanakunku. Chay kamachiqkunata Diospa Reinon chinkachinqa. Chaymantataq tukuy Jallpʼapi Diospa Reinollan kamachinqa (Daniel 2:44). Chaypiqa manaña maqanakuy, wañuchinakuy, phiñanakuy kanqachu. Tukuy runaqa mana phiñanakuspa, munanakuspa kawsanqa (Miqueas 4:3, 4).
7. Jesuspa waranqa watata kamachiyninpi, juntʼa sunqu runaqa pisimanta pisi mana juchayuqman tukunqa, tukuy Jallpʼataq tʼikapachaman tikrakunqa. Jesusqa chay waranqa watakunapi, Dios kamachisqanta juntʼanqa. Chaymanta Tatanman Reinota jaywapunqa (1 Corintios 15:24). ¿Manachu masiykiman, familiaykiman Diospa Reinon ruwananmanta willariwaq?
[13 paginapi dibujo/foto]
Jesuspa kamachiyninpiqa manaña chiqninakuy nitaq phiñanakuy kanqachu