10 Yachaqana
¿Ima ruwaykunatataq Dios chiqnin?
¿Imaynatá Dios chiqnisqanta qhawananchik tiyan? (1)
¿Ima millay ruwaykunatataq Dios chiqnin? (2)
¿Imaynatá cristianokuna qhawanku llullakuyta? (3) ¿Qullqirayku pukllayta? (3) ¿Suwakuyta? (3) ¿Maqanakuyta? (4) ¿Layqakuyta? (5) ¿Machayta? (6)
¿Imaynatá kay millay ruwaykunata saqisunman? (7)
1. Diosta kasukuqkunaqa allin kaqta munakunku, millay kaqtataq chiqninku (Salmo 97:10). Millaykunata chiqnispaqa, mana millaykunata ruwanchikchu. ¿Mayqinkunataq chaykuna kanku?
2. Khuchichakuy: Manaraq casarakuspa qhariwarmijina puñuykuy, qhinchachakuy, animalwan khuchichakuy, kikin familianmanta warmiwan puñuykuy, qharipura jinanakuy ima, Diospa ñawpaqinpi jatun jucha kanku (Levítico 18:6; Romanos 1:26, 27; 1 Corintios 6:9, 10). Mana kasarakuspalla qhariwarmijina kawsakuqkuna tʼaqanakunanku tiyan, manaqa ley nisqanmanjina casarakunanku tiyan (Hebreos 13:4).
3. Llullakuq, qullqirayku pukllaq, suwakuq: Diosqa mana jaykʼaq llullakunchu (Tito 1:2). Chayrayku Diosta kasukuqkunaqa mana llullakunkuchu (Proverbios 6:16-19; Colosenses 3:9, 10). Qullqirayku pukllayqa, qullqita munapayayman apawanchik. Chayrayku cristianoqa mana loteriata, bingota, nitaq imatapis qullqirayku pukllanchu (Efesios 5:3-5). Mana suwakunkuchu, nitaq imatapis suwasqata rantinkuchu, manataq chʼinllamanta imatapis apakapunkuchu (Éxodo 20:15; Efesios 4:28).
4. Sinchi phiñakuq, maqanakuq: Sinchi phiñakuyqa maqanakuyman pusan (Génesis 4:5-8). Maqanakuqkunaqa mana Dioswan masichakunkumanchu (Salmo 11:5; Proverbios 22:24, 25). Saqramanqa, mana saqrallawantaq kutichinanchikchu tiyan (Proverbios 24:29; Romanos 12:17-21).
5. Layqakuna, aysirikuna: Wakinqa unquykunata jampinapaq supaykunata waqyanku. Wakinkunataq runata unquchinapaq, chayri wañuchinapaq layqanku. Chaykunata Supaypa atiyninwan ruwakun. Chayrayku cristianoqa chaykunamanta karunchakunan tiyan (Deuteronomio 18:9-13). Layqakunamanta jarkʼakunapaq Diosman qayllaykunanchik tiyan (Proverbios 18:10).
6. Machaq: Vinota, aqhata wak machachiqkunatapis, tumpata upyayqa mana juchachu (Salmo 104:15; 1 Timoteo 5:23). Chaywanpis Diosqa machaqkunata juchachan (1 Corintios 5:11-13; 1 Timoteo 3:8). Machayqa unquchiwanchik, familianchiktataq tʼaqan. Chantapis wak millay ruwaykunaman urmachiwanchik (Proverbios 23:20, 21, 29-35).
7. Dios chiqnisqanta ruwaqkunaqa “mana Diospa reinonta herenciata jina japʼenqankuchu” (Gálatas 5:19-21). Diosta munakuptiyki, munasqantataq ruwayta munaptiyki, chay millay ruwaykunata saqiyta atinki (1 Juan 5:3). Saqra kaqtaqa chiqniyta yachakunayki tiyan (Romanos 12:9). Diosta kasukuqkunawan masichakuy (Proverbios 13:20). Qutuchakuymanta kuraqkunaqa yanapasunqanku (Santiago 5:14). Chantapis, Diosmanta mañakuyqa yanapasunqa (Filipenses 4:6, 7, 13).
[20, 21 paginaspi dibujos/fotos]
Diosninchik machayta, suwakuyta, qullqirayku pukllayta, maqanakuyta ima chiqnin