¿Pikunataq Diospa masinkuna kanku?

Jesucristoqa Jehovap Churin, may munasqa masintaq. Manaraq runajina Jallpʼapi kawsachkaptin, Jesusqa janaqpachapi juk espirítu may atiyniyuq karqa (Juan 17:5). Chaymanta Jallpʼaman jamurqa, Diosmanta chiqa kaqta runaman yachachinanpaq (Juan 18:37). Chantapis, runa kawsayninta qurqa, juchamanta wañuymantapis, kasukuq runakunata qhispichinanpaq (Romanos 6:23). Jesusqa Diospa Reinonmanta Reyña, kay Reinotaq janaqpachamanta kamachiq, paraisoman Jallpʼata tikrachinqa (Apocalipsis 19:16).

Angelkunapis Diospa masinkuna kanku. Angelkunaqa mana runajina Jallpʼapi kawsayninkuta qallarirqankuchu. Janaqpachapi manaraq Dios Jallpʼata ruwachkaptin ruwasqaña karqanku (Job 38:4-7). Angelkuna junukuna kanku (Daniel 7:10). Janaqpachamanta Diospa masinkuna, paymanta chiqata tukuy yachakunankuta munanku (Apocalipsis 14:6, 7).

Diosqa kay Jallpʼapi masikunayuq, ñuqamanta sutʼinchaqkuna nispa sutichan. Sutʼinchaqqa juchachana wasip ñawpaqinpi pillamantapis, imamantapis, kasqanta parlan. Jehovamanta Sutʼinchaqkuna, Diosmanta, munayninmanta ima runakunaman rimanku (Isaías 43:10). Angelkunajina, Jehovamanta Sutʼinchaqkuna Diosmanta yachakunaykipaq yanapasuyta munanku. Diospa masin kanaykitapis munanku.