¿Imamantapis runaykachanachu?

¿IMAYNATAJ runaykachaj runa?... Sutʼincharina. Ichapis pelotata jaytʼayta munaspa wayrallata jaytʼarqanki chayri mana waskawan phinkiyta aterqankichu. Pipis asiykukususpa, ¿nisorqachu “noqamá yachaneqa”, nispa?... Chayta nisojqa runaykachasharqa.

Ajinata nisojtinku, ¿kusikunkichu?... Chayta ruwajtiyki, ¿manacharí wajkunapis kusikunkumanchu?... “Noqamá allin runaqa kani”, nispa wajkunaman nina, ¿allinchu kanman?... ¿Runaykachajta Jehová allinpajchu qhawan?...

Jesusqa runaykachaj runasta rejserqa. Paykunaqa may kasqankuta yuyakuspa wajkunata pisipaj qhawaj kanku. Chayta ruway mana allinchu kasqanta rikuchinanpajtaj, Jesusqa uj rijchʼanachinata paykunaman willarqa. Chayta willarisqayki.

Jesusqa uj fariseomanta, impuestota cobraj runamantawan parlarqa. Fariseosqa religionmanta yachachejkuna karqanku, wajkunamanta aswan cheqan runas kasqankutataj yuyakoj kanku. Jesús nerqa chay fariseo temploman Diosmanta mañakoj risqanta.

Impuestota cobraj runapis Diosmanta mañakoj temploman rillasqataj. Runasqa impuesterosta chejnikoj kanku, suwas kasqankuta yuyasqankurayku. Ashkha impuesterostaj suwakojpuni kanku.

Templopi kashaspa, fariseoqa ajinata mañakusqa: ‘Diosníy, graciasta qoyki, imaraykuchus mana wajkuna jina juchasapachu kani. Mana suwakunichu, nitaj sajra kajta ruwanichu. Manallataj kay impuestero jinachu kani. Cheqan runa kani. Noqaqa semanapi iskay kutita mana mikhunichu qanpi astawan tʼukurinaypaj. Tukuy kapuyniymantataj sapa chunkamanta ujta templopaj qoni’, nispa. Chay fariseoqa may kasqanta yuyakorqa, ¿icharí?... Diosmanrajtaj chayta nisqapis.

Impuestota cobraj runatajrí mana jinachu karqa. Diosmanta mañakunanpaj mana patallamanpis qhawarisqachu. Astawanpis karullapi sayaspa kʼumuykukusqa. Juchasninmanta mayta pesachikuspataj pechonta takakusqa. Payqa Diosman mana sumaj runa kasqantachu nisqa. Astawanpis mañakusqa: “Diosníy, khuyariway ari noqa juchasapata”, nispa.

Chay iskay runasmanta, ¿mayqentataj Dios allinpaj qhawarqa? ¿Cheqan runapaj qhawakoj fariseotachu? Chayri, ¿juchasninmanta pesachikoj impuesterotachu?...

Jesús nerqa impuesterota Dios allinpaj qhawasqanta. ¿Imaraykú? Jesús sutʼincharqa: “Jatunchakojqa kʼumuykachachisqa rikhurenqa, kʼumuykukojtajrí jatunchasqa kanqa”, nispa (Lucas 18:9-14).

¿Imatá Jesús chay rijchʼanachinawan yachacherqa?... Aswan sumajpaj qhawakuy mana allinchu kasqanta. Mana sumajpaj qhawakusqanchejta nejtinchejpis, ichá ruwasqanchejwan chayta rikuchishasunman. ¿Maykʼajllapis chayta ruwarqankichu?... Apóstol Pedromanta parlarina.

Jesusqa apostolesninman nerqa, payta presochajtinku tukuyninku saqerparinankuta. Pedrotaj maylla kuticherqa: “Tukuyninku saqesojtinkupis, noqaqa manapuni jaykʼajpis qanta saqerparisqaykichu”, nispa. Pedroqa chayta nispa pantarqa. Payllapi atienekusharqa. Jesustataj saqerparerqapuni. Chaywanpis Jesusman kutirinporqa, chaytataj kay libroj 30 yachaqananpi yachakusun (Mateo 26:31-33).

Kaypi tʼukuriy. Ichá profesorniyki qanta, compañeroykitawan imallatapis tapurisunkichejman. ¿Imataj kanman chay rato kutichejtiyki, compañeroykitaj mana? Chay tapuypa kutichiyninta yachasqaykimanta kusikuwaj. Jinapis, ¿allinchu kanman aswan sumaj kasqaykita yuyakunayki?... ¿Allinchu kanman compañeroykita pʼenqachispa aswan sumajpaj qhawachikunayki?...

Fariseoqa chayman rijchʼakojta ruwarqa. Payqa impuesteromanta aswan sumaj kasqanta yuyakorqa. Jesustaj chay fariseo pantasqa kasqanta nerqa. Noqanchejpis ichá wakin imasta wajkunamanta aswan sumajta ruwanchej, chaytaj mana ninayanchu aswan sumaj runas kasqanchejta.

Wajkunamanta astawan yachajtinchejpis, ¿runaykachanachu kanman?... Kaypi tʼukuriy: ¿Pitaj yuyayniyojta ruwawanchej?... Dios. Casi tukuy imata yachasqanchejtaqa wajkunamanta yachakorqanchej. Ichapis uj libropi leerqanchej chayri pillapis yachachiwarqanchej. Wakin imasta sapallanchejmanta yachaspapis, ¿imaynapí chayta yachakorqanchej?... Dios yuyayniyojta ruwawasqanchejrayku.

Pipis imallatapis ruwananpaj kallpachakojtin, allin kanman “sumajta ruwanki”, nispa ninayki. Chayri aswan sumajta ruwananpaj yanapariwaj. ¿Qanpis munawajcharí wajkuna yanaparisunankuta?...

Wakin runasqa wajkunamanta aswan kallpayoj kanku. Ichá qanpis hermanaykimanta chayri hermanoykimanta aswan kallpayoj kanki. Chayqa, ¿runaykachanaykipajchu?... Mana. Imajtinchus mikhunata mikhusqanchejrayku kallpayoj kanchej. Mikhuna kapunawanchejpajtaj, Dios intita kʼanchachimun, parachimuntaj, ¿icharí?... Chayrayku kallpayoj kanchej chayqa, Diosman agradecekuna tiyan (Hechos 14:16, 17).

Ni pipis alabakojkunataqa uyariyta munanchu, ¿icharí?... Jesuspa nisqanta yuyarina: “Imaynatachus munankichej runas qankunapaj ruwanankuta, ajinallatataj qankunapis paykunapaj ruwaychej”. Chay kamachiyta juntʼaspaqa, mana Jesuspa rijchʼanachinanmanta jatunchakoj fariseo jinachu kasun (Lucas 6:31).

Ujpacha, uj runa Jesusta “kʼacha” nerqa. ¿Jesús nerqachu “arí, kʼacha kani”, nispa?... Mana chaytachu nerqa. Astawanpis nerqa: “Mana pipis kʼachaqa kanchu; Dios sapallan kʼachaqa”, nispa (Marcos 10:18). Jesusqa mana pantaj runa kaspapis, mana alabakorqachu. Astawanpis Tatan Jehovata jatuncharqa.

Chantá, ¿wajkunamanta nisqa imamantataj astawan kusikusunman?... Jehovata rejsisqanchejmanta kusikusunman. Inti chinkaykushajtin cielota may kʼachituta pukayarishajta rikuspa chayri Diospa waj tʼukuna ruwasqasninta rikuspa, wajkunaman nisunman: “Jehová Diosninchej kaytaqa ruwan”, nispa. Jehovaqa tʼukuna imasta ruwarqa, qhepamanpis ruwallanqataj. Chaykunamantataj wajkunaman willarinapuni.