¡Ama llullakunachu!

KAYPI tʼukuriy. Uj imillita mamanman nin: “Escuelamanta cheqetanta jampusaj”, nispa. Jinapis imillitaqa amiguitasninwan pujllaj quedakun, wasinman chayaspataj mamanman nin: “Profesoray mana usqhaytachu kachanpuwan”, nispa. ¿Allillanchu ajinata llullakunan?...

Kaypi tʼukurillaytaj. Uj lloqallitu tatanta nin: “Mana tatáy, mana wasi ukhupi pelotawan pujllarqanichu”, nispa. Chaywanpis pujllarqapuni. ¿Allinchu “mana pujllarqanichu” ninan?...

Jesusqa imaynachus kanata yachacherqa. Pay nerqa: “Parlayniykichejqa kay jina kachun: Arí, arí, nispa; chayrí: Mana, mana, nispa. Chaymanta aswanqa sajramanta jamun”, nispa (Mateo 5:37). ¿Imatá Jesús chaywan nisharqa?... Nisqanchejta juntʼanapuni kasqanta.

Bibliaqa iskay runasmanta parlaspa mana llullakunata yachachiwanchej. Chay runasqa Jesuspa yachachisqasnin kasqankuta nerqanku. Paykunamanta parlarina.

Jesús wañupusqanmanta casi iskay killanman, ashkha runas karu lugaresmanta Jerusalenman jamorqanku, Pentecostés fiestaman. Chaypi apóstol Pedro, runasman sumajta sutʼincharqa Jesusmanta, Jesusta Jehová kausarichisqanmanta ima. Jerusalenman rejkunamanta ashkhastaj, chay kutipi recién Jesusmanta parlajta uyarerqanku. Chayrayku astawan yachakuyta munarqanku. Chaypaj, ¿imatá ruwarqanku?

Paykunaqa aswan unayta Jerusalenpi quedakorqanku. Wakinpataqa qolqenku tukukaporqa, niñataj mikhunankupajpis karqachu. Jerusalenpi tiyakoj hermanosqa, paykunata yanapayta munarqanku. Chayrayku wakin imasninkuta venderqanku, Jesuspa apostolesninmantaj qolqeta jaywarqanku. Apostolestaj chayta, pisichikojkunaman parterqanku.

Ananiaswan warmin Safirawanqa, Jerusalén congregacionmanta karqanku, jallpʼankutataj venderqanku. Paykunataqa ni pipis vendenankuta nerqachu. Chantá, ¿imajtín venderqanku? ¿Mosoj hermanosta munakusqankuraykuchu? Mana. Astawanqa allinpaj qhawachikuyta munasqankurayku. Chayraykutaj yachachinakorqanku, vendesqankumanta tukuy qolqeta hermanospaj qoshasqankuta ninankupaj. Paykunaqa wakin qolqellata qoyta munarqanku, “tukuynin qolqeta qoshayku”, nispa. ¿Chay yuyasqanku allinchu karqa?...

Ananiasqa wakin qolqeta pakaykuspa, wakillanta apostolesman aparqa. Diostaj yacharqa mana tukuynintachu apasqanta. Chayrayku Pedroman willarqa Ananías llullakushasqanta.

Chantá Pedro nerqa: ‘Ananías, ¿imaraykú Satanasta sonqoykipi kasunki espíritu santoman llullakunaykipaj, vendesqayki qolqemanta wakinta pakaykunaykipaj? Manaraj vendeshajtiyki, jallpʼaqa qanpata karqa. Vendejtiykipis, qanllapatataj chay qolqe karqa. ¿Imaraykú sonqoykipi yuyarqanki kayta ruwayta? Qanqa mana runasmanchu llullakunki, astawanqa Diosman’, nispa.

Arí, chay ruwasqanqa jatun jucha karqa. Ananiasqa llullakusharqa, mana nisqanman jinachu ruwasharqa. ¿Imataj chanta karqa? Biblia nin: “Ananiasqa Pedroj nisqanta uyariytawan, wañusqa wijchʼukorqa”, nispa. Diosqa Ananiasta wañucherqa. Chaymantataj Ananiasta pʼampamorqanku.

Kinsa horanman jina, Ananiaspa warmin yaykumorqa. Paytaj mana yacharqachu imachus pasasqanta. Pedrotaj Safirata taporqa: “Niway, kay chhika qolqepichu jallpʼata venderqankichej?”, nispa.

Safirataj nerqa: “Arí, chay chhikapi vendekorqa”, nispa. Chaytaj llulla karqa, imajtinchus wakin qolqeta pakaykorqanku. Chayrayku Diosqa, Safiratapis wañuchillarqataj (Hechos 5:1-11).

¿Imatá Ananiasmanta Safiramantawan yachakunchej?... Diosqa llullasta chejnikusqanta. Payqa mana munanchu llullakunanchejta. Ashkha runastajrí, llullakoyqa allillan kasqanta yuyanku. ¿Llullakuy allillanchu?... ¿Yacharqankichu onqoykuna, nanaykuna, wañuypis uj ángel llullakusqanrayku rikhurisqanta?...

Yuyarikuy, Supayqa Evata engañarqa. Nerqataj Diosta mana kasuspa, mana wañunanta, mana mikhunanchu karqa chay sachʼamantapis mikhunallanta. Evaqa Supayta creespa, chay sachʼaj poqoyninta mikhuykorqa. Qosanmanpis jaywallarqataj, ajinamanta iskayninku juchallikorqanku. Wawasninkupis juchasapasllataj karqanku, chayrayku ñakʼariy, wañuy ima tiyan. ¿Imaynamantá tukuy chay qallarerqa?... Supay llullakusqanrayku.

Chayrayku Jesús nerqa, Supayqa “llulla, llullakuypa tatantaj” kasqanta. Ñaupaj kutirayku llullakojqa Supay karqa. Pichus llullakojqa, Supay jinallataj ruwashan. Maykʼajllapis llullakuyta munashaspaqa, chayta yuyarikuna (Juan 8:44).

¿Imata ruwaspataj llullakuyta munawaj?... Imata ruwarpaspapis, ¿llullakuytacharí munanki?... Ichá mana reparakuspalla imatapis pʼakirparqanki. Tapusojtinku, ¿allinchu kanman ujnin hermanoykita tumpanayki chayri mana yachajman tukunayki?...

Tareasniykita mana tukuspa, ¿allinchu kanman tukusqaykitaña ninayki?... Ananiasmanta Safiramantawan yuyarikuy. Paykunaqa llullakorqanku, llullakusqankuraykutaj wañorqanku. Ajinamanta Diosqa rikucherqa, llullakuy mana allinchu kasqanta.

Chayrayku imata ruwarpaspapis llullakojtinchejqa, aswan chʼampay kanqa. Mana tumpallatapis llullakunachu. Bibliaqa niwanchej: “Sapa ujpis cheqa kajta parlaychej”, “amallataj purajmanta llullanakuychejchu”, nispa. Jehovaqa ni jaykʼaj llullakunchu, munantaj noqanchejpis pay jina kananchejta (Efesios 4:25; Colosenses 3:9, 10).