Diospa mosoj pachanpi kausakuwaj

DIOSQA Adantawan Evatawan Edén huertaman churarqa. Paykunataj juchallikusqankurayku wañorqanku. Chaywanpis Jehovaqa, wawasninkuman uj suyakuyta qorqa, Paraisopi wiñaypaj kausakuyta atinankupaj. Biblia nin: “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku”, nispa (Salmo 37:29).

Bibliaqa ‘mosoj cielo, mosoj pacha’ ima kananta nin (Isaías 65:17; 2 Pedro 3:13). Kay tiempomanta gobiernosqa ‘cielowan’ ninakunku. ‘Mosoj cielotajrí’ Diospa Gobiernonwan ninakun. Chaypitaj Jesucristo, wajkunawan ima kamachenqa. Chay gobiernoqa cheqan, allin kausaytataj apamonqa. Chayrayku mosoj cielo Jallpʼantinta kamachejtin, ¡kausayqa may sumaj kanqa!

‘Mosoj pacharí’, ¿imawantaj ninakun?... Jehovata munakoj runaswan ninakun. Bibliaqa ‘kay pacha’ nispa, wakin kuti mana Jallpʼamantapunichu parlan, manaqa runasmanta (Salmo 66:4; 96:1, 11). Chayrayku Jehovata munakojkunaqa, kay Jallpʼapi kausakonqanku.

Kay tiempomanta sajra runasqa niña kanqankuchu. Yachakorqanchej jina, Noej tiemponmanta sajra runasqa, Jatun Parapi chinkachisqa karqanku. Kay tiempomanta sajra runastaj, Armagedonpi chinkachisqa kanqanku. Kunanqa Armagedón pasayta imaynachus mosoj pachapi kausay kananta yachakuna.

¿Diospa mosoj pachanpi wiñaypaj kausakuyta munankichu?... Ni mayqen doctorpis wiñayta kausanapaj yanapawasunmanchu. Nitaj ima jampipis mana wañunapaj kanchu. Diosman qayllaykuspalla wiñaypaj kausayta atisunman. Jesustaj, imaynatachus chayta ruwanata willawanchej.

Bibliapi Juan 17:3 versiculota maskʼarina. Chaypi Jesús nerqa: “Kaymin chay wiñay kawsayqa: Qan kʼata cheqa Diosta rejsisunanku, kachamusqayki Jesucristotapis”, nispa.

Jesús nisqanman jina, ¿imatá ruwana tiyan wiñay kausayta japʼinapaj?... Ñaupajtaqa Tatanchej Jehovamanta, Wawanmanta ima yachakuna tiyan. Wawanqa noqanchejrayku kausayninta qorqa. Paykunamanta yachakunapajqa Bibliata estudiana tiyan. Jesusmanta yachakuna librotaj chaypaj yanapawanchej.

¿Imaynatá Jehovata rejsiy wiñay kausayta japʼinapaj yanapawasun?... Imaynatachus sapa día mikhunanchejpuni tiyan, ajinallatataj Jehovamanta sapa día yachakunanchej tiyan. Biblia nin: “Mana tʼantallawanchu runaqa kawsanqa; astawanqa, Diospa siminmanta tukuy llojsimoj palabraswan”, nispa (Mateo 4:4).

Chantapis Jesucristomanta yachakunallanchejtaj tiyan. Imaraykuchus Diosqa payta kachamorqa, juchasninchej perdonasqa kananpaj. Biblia nin: “Salvacionqa Jesucristollapi tarikun”, nispa. Chantá nillantaj: “Churipi creejqa wiñay kawsayniyoj”, nispa (Hechos 4:12; Juan 3:36). Jesusnejllata wiñaypaj kausayta atisqanchejta, ¿creenkichu?... Jina kajtenqa, Jesusmanta sapa pʼunchay yachakullaypuni, nisqantataj kasukuy.

Chaypajqa kay librota kutin kutita leeriy. Dibujosnintapis qhawariy, tʼukuriytaj. Chay dibujospi rikhurej tapuykunaman kutichiy. Chantapis tataykiwan chayri mamaykiwan kay librota leeriy. Ni mayqenninku qanwan kajtintaj, waj kuraj runaswan chayri waj wawaswan leeriwaj. Chayta ruwaspaqa, ichá pillatapis Jesusmanta yachakunanpaj yanaparinki. Ajinamantataj paypis, imatachus mosoj pachapi kausakunanpaj ruwananta yachakonqa. Chayqa may sumaj kanman, ¿icharí?...

Biblia nin: “Kay pachaqa tukukapushan”, nispa. Jinapis nillantaj, imaynatachus Diospa mosoj pachanpi wiñaypaj kausakunata. Nintaj: “Diospa munayninta ruwajrí, wiñaypaj kawsanqa”, nispa (1 Juan 2:17). Chayrayku, ¿imatá ruwana tiyan Diospa mosoj pachanpi wiñaypaj kausakunapaj?... Jehovamanta, munasqa Wawan Jesusmantawan yachakuna tiyan. Yachakusqanchejman jinataj ruwana tiyan. Munayku kay libro chayta ruwanaykipaj yanapasunanta.