37 kaq Reinomanta willaykuna

Kay willayqa tukuy jallpʼapaq

¡Llulla religionpa tukukuynin qayllamuchkanña!

▪ ¿Imataq llulla religionri?

▪ ¿Maykʼaqtaq tukukunqari?

▪ Llulla religión tukukunan kaptin, ¿imatataq ruwanayki tiyan?

¿Imataq llulla religionri?

¿Religionpa sutinpi wanchinakusqankuta qhawaspa llakikunkichu? ¿Religoniyuq runa wañuchisqankuta, qullqirayku khuchichakusqankuta qhawaspa, manachu imachus chiqan kasqanta tapuchisunki? ¿Imaraykutaq religionrayku kay chhika llakiykuna rikhurin?

Mana tukuy religionchu juchuyuq, manaqa llulla religionkunalla. Religión ukhupi jatunpaq qawasqa runajina, Jesucristo llulla religionmanta parlaspa, mana allin sachʼajina mana allin poquyniyuq kananta nirqa (Mateo 7:15-17). ¿Ima puquykunatataq llulla religión puqun?

Lulla religionqa...

◼ ... POLITICAPI CHʼAMPAYKUNAPI SATʼIKUN. Kay revista Asiaweek nin: “Asia llaqtapi wak llaqtakunapiwan, runata umachaqkuna astawan atiyta munaspa, religioniqta runap umanta tʼuqpinku, paykunallapaq imatapis munaspa”. Chantapis ninllantaq: chayrayku “tukuy runa tʼuqpiman tukuchkanku” nispa. Juk allin riqsisqa religioso Estados Unidos llaqtapi jinata nirqa: “Wañuchiykuna tukukunanpaq, wañuchiqkunata tukuchina tiyan” nispa. Pay nisqanmanjina “kay wañuchiqkunata Señorpa sutinpi wañuchina tiyan”. Mana chaymanjinataq Biblia nin: “Sichus pipis ninman: Diosta munakuni, nispa, hermanontataj chejninman chayqa, payqa llullamin” nispa (1 Juan 4:20). Jesús nirllarqataq: “Enemigosniykichejta munakuychej” nispa (Mateo 5:44). ¿Machkha religionkunataq runata guerraman kachanku?

◼ ... LLULLA YACHACHIYKUNATA YACHACHIN. Yaqha tukuy religionkunaqa, runa almayuq, espirituyuq kasqanta yachachinku, runa wañupuptinpis almaqa chayri espirituqa mana wañusqanta ninku. Wakin religonkunaqa chayta yachachispa runata chʼawkiyanku, wañusqasniykipaq mañapuchkayki nispa qullqita mañanku. Mana chayman jinataq Biblia yachachiwanchik: “Kawsashajkunaqa wañunankuta yachakunku; wañusqasri mana imatapis yachankuchu” nispa. (Eclesiastés 9:5.) Jesusqa wañusqakuna kawsarimunankuta yachachirqa, wañusqakuna mana wañuptinku, qhasitacha chayta yachachinman karqa (Juan 11:11-25). ¿Religionniyki, alma wañupusqantachu yachachin?

◼ ... KHUCHICHAKUYTA, QHINCHACHAKUYTA SAQIN. Wakin suyukunapi religionkunaqa, qʼiwakuna chayri qʼiwajina warmikuna tiyakunankupaq, manaqa kasarakunankupaq, kamachiqkunata matʼinku. Wakin religionkuna khuchichakuyta juchachaspapis, chay religiomanta umakuna, wawakunata kallparpaptinku jinamanta khuchichakuptinku, mana imatapis ninkuchu. ¿Chaytachu Biblia yachachin? Mana, Bibliaqa sutʼita niwanchik: “Ama pantaychejchu: soltero kashaspa khuchichakojkuna, lantista yupaychajkuna, kasarasqa kashaspa wajwan khuchichakojkuna, qhari kashsaspa warmiman tukojkuna, qhari pura jinanakojkuna [...] manapuni Diospa reinontaqa herenciata jina japʼenqankuchu” nispa (1 Corintios 6:9, 10). ¿Uyarinkichu ima religionkunataq runa khuchichakunanta saqin?

¿Imapitaq, mana allin puquyniyuq llulla religión, tukunqa? Jesús willawarqanchikña: “Ima sachʼallapis mana walejta poqospaqa, kʼutusqa kanqa, ninamantaq kanasqa” kanqa, nispa (Mateo 7:19). Arí, kay llulla religionkunaqa kʼutusqa, kanasqa ima kanqanku. ¿Imaynata chayta ruwakunqa? Bibliamanta Apocalipsispa profecianpi 17, 18 tʼaqakunapi, kay tapuyman kutikchiwanchik.

¿Imaynatataq llulla religión tukunqa?

Qhawariy, qanchis umayuq, chunka waqrayuq phiña animalpa wasanpi, juk khuchi phisu warmita tiyachkaqta (Apocalipsis 17:1-4). ¿Pitaq chay warmiri? Chay warmiqa “kay pachapi reyesta kamachishan”, puka pʼachayuq pʼachillisqa, qʼuwarakun, chantapis may qhapaq warmi. Astawanpis layqaspa ‘tukuy suyuta chʼawkiyan’ (Apocalipsis 17:18; 18:12, 13, 23). Bibliaqa, kay khuchi phisu warmi, tukuy llulla religión kasqankuta rikuchiwanchik, mana juk religionllachu manaqa, tukuy mana allinta puquqkuna kasqankuta niwanchik.

Chay phiña animaltaq, tukuy jatuchaq atiyniyuq suyukunawan ninakun (Apocalipsis 17:10-13)a. Patanpiqa llulla religión tiyakuchkan, munayninpi suyukunata apaykachayta munaspa.

Tʼukunapaqjinataq: “Chay chunka wajras, phiña animalpi rikorqanki, chaykunaqa phisu warmita chejnispa, sapanta kʼalallata saqerpayanqanku. Aychanta mikhonqanku, ninawantaj ruphachenqanku” (Apocalipsis 17:16). Mana pipis suyachkaptin atiyniyuq suyukuna, khuchichakuq phisu warmita mukhuyakapunqanku, wiñaypaqtaq chinkachinqanku. ¿Imaptintaq jinata chinkachinqankuri? Bibliapi Apocalipsis pʼanqapi jinata Diosninchik kutichiwanchik: “Imaraykuchus Diosqa sonqonkuman churanqa paypa munayninta ruwanankupaq” (Apocalipsis 17:17). Jinamanta Diosninchik llulla religionkunata, saqrata Diospa sutimpi ruwaqkunata pagachinqa. Ari, Jehová Diosqa chiqanta ruwananpaq, politicokunata uqharinqa, khuchichakuq phisu warmita tukuchinanpaq.

¿Imatataq ruwanayki tiyan mana llulla religionwan khuska tukukunaykipaq? “Llojsimuchej chay llajtamanta, noqajta kajkuna” nispa Diospa angelnin kʼamiriwanchik (Apocalipsis 18:4). Kunanqa llulla religionmanta lluqsipunanchik tiyan. ¿Imaynamantá? Mana Diosmanta qunqapuspachu, mana Diospi creeqkunawan, chaykunapis tukukapunqanku, chinkanqanku (2 Tesalonicenses 1:6-9). Chiqa religionman ayqinanchik tiyan. ¿Imaynata yachasunman mayqinchus chiqa religión kasqanta?

¿Imaynata chiqa religionta riqsisunman?

¿Imatataq chiqa religión puquchinan tiyan? (Mateo 7:17.)

Chiqa religionqa...

◼ ... MUNAKUYTA RIKUCHIN. Diosta yupaychaqkunaqa “mana kay pachajtachu kanku”, wak laya runata chantapis wak aylluyuq runata mana chiqninkuchu, manaqa puraqmanta ‘munanakunku’ (Juan 13:35; 17:16; Hechos 10:34, 35). Maqanakunamantaqa, munakusqankurayku wakkunapaq kawsayninta quyta atinkuman (1 Juan 3:16).

◼ ... DIOSPA PALABRANPI ATIYKUKUN. Chiqa religionqa mana tradicionkunata, nitaq ‘runap kamachisqanta’ yachachinchu; manaqa Bibliap yachachisqanta (Mateo 15:6-9). ¿Imaraykutaq? ‘Diosmanta tukuy Qhillqasqaqa paypa yuyaychasqan kasqanrayku, may sumaq kachkan yachachinapaq, juchata reparachinapaq, chiqa kaqman kutirichinapaq’ (2 Timoteo 3:16).

◼ ... FAMILIATA TANTAN, CHANTAPIS LLIMPHU KAWSAYTA YACHACHIN. Chiqa religionqa qusata ‘warminta aychantajina’ munakunanpaq kʼamin. Warmita qusanta respetananpaq yanapan, wawatataq mamanta tatanta kasunanpaq yachachin (Efesios 5:28, 33; 6:1). Kamachiqqa, kawsayninpi llimphu kanan tiyan, wakkuna kikinta ruwanakupaq (1 Timoteo 3:1-10).

¿Mayqin religionllapis kaykunata juntʼanchu? Holocaust Politics libropi 2001 watamanta, nin: “Sichus astawan runa Jehovamanta sutʼinchaqkuna, yachachisqankumanjina ruwankuman chayqa, mana Holocausto kanmanchu karqa, nitaq wak wañuchiykunapis kanmanchu”.

Jehovamanta sutʼinchaqkuna —235 suyukunapi— mana Bibliamanta llimphu kawsayta yachachillankuchu manaqa yachachisqankuta ruwanku. Yachanaykipaq imatachus Dios munan ñuqanchikmanta yanapata mañakunaykita munayku, jinamanta yupaychayniykiwan Diosta kusichinaykipaq. Usqhayta chayta ruwanayki tiyan, imaraykuchus ¡llulla religionpa tukukuynin qayllapiña kachkan! (Sofonías 2:2, 3.)

Astawan, Jehovamanta sutʼinchaqkuna yachachisqankumanta yachakuyta munanki chayqa, kay urapi rikhuriqman qillqarimuy.

□ Kay qillqarata ¿Imatataj Diosqa munan ñoqanchismanta? apachimuwaychik.

□ Sapa wasipi qhasillamanta yachachisqaychikmanta willariwaychik.

[Sutʼinchaynin]

[3 paginapi sutʼinchaynin]

Llulla religionqa munayninpi “kay pachapi reyesta kamachishan”

[3 paginapi sutʼinchaynin]

“Llojsimuychej chay llajtamanta, noqajta kajkuna”