Paykunajina ruwanaykipaq: Ezequías

Ezequiasqa, 25 watayuqllaraq kachkaspa Judá llaqtata kamachiyta qallarirqa, chantá imayna kamachiqchus kananta akllanan karqa. ¿Diosta wasanchaq tatanjinachu ruwanman karqa? Tatan Ajazqa mana jaykʼaq juchallikusqanmanta pesachikurqachu ni wañunan pʼunchaypipis. Ajazqa Jehovap templonta chʼichicharqa, lantista yupaychanankupaqtaq israelitasta tanqarqa, chantá juknin churintapis chay lantispaq qʼulachirqa (2 Crónicas 28:1-4). Chaywanpis Ezequiasqa, Diosman chiqa sunqullapuni karqa, tatan Ajaz puraq uya kaptinpis. Chantá mana yuyarqachu tatanjinapuni pantanan kasqanta. Astawanpis “Ezequiasqa Tata Diostapuni qhaterqa” (2 Reyes 18:6).

¿Qamtarí? Tatasniykimanta mayqillanpis, chiqa Diosta yupaychasqaykimanta, ¿asipayasunkichu? ¿Sunquta nanachinapaqjinachu kʼamisunki? ¿Ima viciomanpis qukunchu? Jina kaptin ama yuyaychu payjinapuni pantanaykita. Ezequiasqa, tatanmanta nisqaqa, Diosta yupaychayta akllarqa. Payqa sumaq kamachiq karqa ‘Judamanta tukuynin reykunamanta mana jukpis payjinaqa karqachu’ (2 Reyes 18:5). Chayrayku, tatasniyki Diosta mana yupaychaptinkupis Ezequiasjina ñawpaqman lluqsinaykipaq Jehová Diosman qayllaykullaypuni.