Jobqa wañuy patapi kaspapis Diosta kasukorqa

DIOSPA kamachisnin, ¿wañuy patapi kaspa payta kasukullankumanpunichu ni imata japʼejtinkupis? Chayta yachanapaj, ñaupa tiempopi Job sutiyoj runamanta parlarina.

Jobqa Abrahanpa parienten karqa. Payqa Arabiapi tiyakorqa israelitas Egiptopi esclavos kashajtinku. Uj pacha, tukuy ángeles cielopi Diospa ñaupaqenpi tantasqa kasharqanku. Satanaspis chayllapitaj kasharqa. Chay kutipi Jehová Diosqa angelesman nerqa, Jobta mayta munakusqanta tukuy sonqo kasukusqanrayku. Nillarqataj ni pi runapis Job jina jallpʼapi kasqanta. Satanasrí Diosman nerqa, Jobman tukuy imata qosqanraykulla, jarkʼasqanraykulla payta sirvisqanta. Chantá nerqa: “Tukuy kapusqanta qhechuy, rikunkitaj uyaykipi maldecisusqanta”, nispa.

Chayrayku Diosqa Jobta Satanaspa makinpi saqerqa. Satanastaj Jobmanta tukuy kapuyninta qhechorqa, wawasninta wañucherqa, millay onqoywantaj onqoykucherqa. Jobqa mana yacharqachu Satanaslla chay llakiykunata apachisqanta. Chayrayku mana entienderqachu, imaraykuchus Dios ñakʼarejta saqesqanta. Jinapis nipuni Jehovata juchacharqachu, nitaj paymanta karunchakorqachu.

Chay qhepata, kinsa runasñataj amigosninman tukuspa Jobta visitaj rerqanku, tukuy imastataj nerqanku. Paykunaqa Jobman nerqanku, Dios payta castigashasqanta pakayllapi juchallisqanrayku. Chantá nillarqankutaj: “Diosqa mana kamachisninmanta llakikunchu, nitaj paykunapi atienekunchu”, nispa. Chayta nispaqa maytapuni pantasharqanku. Paykunaj parlasqankoqa Job libromanta ashkha capitulospi kashan. Jobtajrí mana paykunata uyarerqachu. Astawanpis wañupunankama Diosta tukuy sonqo kasukunanta nerqa.

Jinapis Jobqa payllapi anchata yuyaspa pantaykorqa. Chayrayku joven Elihuqa, pichus tukuy ima nisqankuta uyarisharqa, Jobta yuyayninman kutiricherqa. Payqa Jobman nerqa, cheqan runa kasqanta ninamantaqa Jehová Diosta, kamachiyninta ima jatunchananta. Jobpa kinsa mana allin amigosnintapis kʼamirpallarqataj.

Chaymantataj Jehová Diosñataj Jobwan parlarerqa. Payqa jallpʼapi, jinallataj cielopi kaj imasta Jobman rikuchispa, runaqa ñaupaqenpi ni imapis kasqanta yachacherqa. Jobtajrí llampʼu sonqo kasqanrayku, pantasqanta reparakorqa. Jehovataj “manchay munakuyniyoj khuyakuyniyojtaj” kasqanrayku, onqoyninmanta sanoyacherqa, kapuynintapis dobleta kutichiporqa, chunka wawaswantaj bendicerqa (Santiago 5:11). Jobqa mayta sufrispapis Diosta munakullarqapuni, kasukullarqapunitaj. Chaywan rikucherqa, runasqa wañuy patapi kaspapis Diosta sirvillaytapuni atisqankuta. Ajinamantataj Satanás llulla kasqanta rikucherqa.

(Job libromanta orqhokun).