¿Imaynataj Edén huertapi kausay karqa?

Jehová Diosqa Adanman, Evamanwan tukuy imata qorqa (Génesis 1:28)

Jehová Diosqa Eva sutiyoj warmita ruwarqa. Paytataj Adanman qorqa warmin kananpaj (Génesis 2:21, 22).

Diosqa Adantawan Evatawan mana juchayojta ruwarqa. Chayrayku yuyayninku, cuerponkupis mana pantayniyoj karqa.

Adanwan Evawanqa Edén huertapi tiyakorqanku. Chay huertaqa manchay kʼachitu karqa. Chaypi karqa uj mayu, frutasniyoj sachʼas, animales ima.

Jehová Diosqa paykunawan parlaj, yachachejtaj. Sichus Diosta kasukunkuman karqa chayqa, Edén huertapi wiñaypaj kausakunkuman karqa.

Diosqa uj sachʼaj poqoyninta amapuni mikhunankuta nerqa (Génesis 2:16, 17)

Jehová Diosqa Adanman, Evamanwan nerqa uj sachʼaj poqoyninta amapuni mikhunankuta. Chay sachʼaj poqoyninta mikhuspaqa wañunanku karqa.

Uj ángel Diospa contranpi oqharikorqa. Chay angeltaj Kuraj Supay, Satanastaj.

Satanasqa mana munarqachu Adanwan Evawan Diosta kasukunankuta. Chayrayku uj katarinejta Evaman nerqa chay sachʼaj poqoyninta mikhuspaqa mana wañunanta, Dios jinataj kananta. Chayta nispaqa llullakusharqa (Génesis 3:1-5).