Uj pakasqa imata yachayta munanchej

¿Munawajchu uj pakasqa imata willarisunayta?...a Willarisqayki. Bibliaqa chay “pakasqa” may sumaj kasqanta nin, Diosmanta kasqanrayku. Nitaj pipis chaymanta yacharqachu. Angelespis, imachus kasqanta yachayta munarqanku. ¿Qanpis wawáy chayta yachayta munawajchu?...

Diosqa, may unay watasña uj qharita uj warmitawan ruwarqa. ¿Ima sutikorqanku?... Adán, Eva. Paykunaqa Edén huertapi tiyakorqanku. Chay huertaqa kʼachitu karqa. Diostaj chaypi tiyakunankupaj paykunaman qorqa. Diosqa Jallpʼantin chay kʼacha huerta jina kananta munarqa. Chayrayku paykuna, wawasninkupiwan chay jinaman tukuchinanku karqa. Diosqa tukuy runas chay kʼacha paraisopi wiñaypaj kausanankuta munarqa. Chaytaj mana jinachu karqa. ¿Imaraykú?

Adanwan Evawanqa, Diosta mana kasukorqankuchu. Chayraykutaj mana uj paraisopichu kausanchej. Jinapis, Diosqa Jallpʼantinta uj paraisoman tukuchinanta nisqan juntʼakunanta nerqa. Tukuy runas wiñaypaj, kusisqastaj kausakonqanku. Chay juntʼakunantataj, ¡may chhika unayta ni pí yacharqachu! ¡Pakasqa kasharqa!

Chaytataj, pisimanta pisi sutʼinchakorqa. Jesusqa Jallpʼapi kashaspa, runasman chaymanta tukuy imata yachacherqa. Diospa Reinon kasqantataj sutʼincharqa. Chantapis Diosmanta mañakuspaqa, “Reinoyki jamuchun” ninchej. ¿Imaraykú? Imaraykuchus Diosqa chay Reinonejta Jallpʼata uj kʼacha paraisoman tukuchenqa.

¿Chay paraisopi kausayta munawajchu?... Diosta kasukoj runaslla Paraisopi kausanqanku. Bibliaqa, Jehová Diosta kasukoj runasmanta parlan. Kay folletopi, pikunachus kasqankuta yachakusunchej. Chantapis imatachus paykuna jina kanapaj ruwananchejta. ¿Paykunamanta yachayta munawajchu wawáy?...