3 YACHAQANA
Rahabqa Jehová Diospi atienekorqa
Jericó llajtamanta parlarina, chay llajtaqa Canaán jallpʼapi tarikorqa. Chaypi tiyakoj runastaj, Jehovapi mana creejchu kanku. Jinapis uj warmeqa, mana chay runas jinachu karqa. Payqa Rahab sutikorqa.
Rahabqa, wawitamantapacha Jehovamanta uyarerqa. Jehovaqa, Israel llajtata enemigosninta atipananpaj yanapasqanta, Moisesnejta Egiptomanta kacharichisqanta, israelitas pasanankupaj Puka Qochata iskayman khallarparisqanta ima. Jericó llajtaj qayllanpi, israelitas kashasqankutapis uyarillarqataj.
Rahabqa Jehovapi atienekusqanrayku wateqaj runasta yanaparqa
Uj chʼiseqa, iskay israelitas Jericó llajtaman wateqaj rerqanku. Rahabpa wasinman chayakorqanku, chaypitaj qhepakorqanku. Chay chʼisillataj Jericó llajtaj reynin uyarerqa, iskay israelitas jallpʼankuta wateqaj risqankuta, Rahabpa wasinpitaj kashasqankuta. Chayrayku iskay soldadosninta maskʼajta kacharqa. ¿Imatá Rahab ruwarqa? Payqa chay iskay runasta wasi patapi pakaykorqa. Reypa soldadosninmantaj nerqa: “Ripunkuña. Chaywanpis sichus qankuna usqhayta rispa qhatiykuwajchej chayqa, japʼerqamuwajchej”, nispa. ¿Yachankichu Rahab imaraykuchus chay runasta yanapasqanta?... Payqa, Jehová cheqa Dios kasqanta yacharqa. Canaán jallpʼatapis israelitasman Jehová qopunanta.
Chay wateqaj runasqa, niraj Rahabpa wasinmanta ripushaspa nerqanku: llajta thuñisqa kajtin, pay, tatasnin, hermanosninpis mana wañunankuta. ¿Imatá Rahab ruwanan karqa mana wañunanpaj?... Chay runas nerqanku: “Kay puka waskhata, ventanaykimanta warkhuykunki. Wasiykimantaj tantaykamunki familiaresniykita”, nispa. Rahabqa chay nisqankuman jinapuni ruwarqa. ¿Chaymanta astawan yachayta munawajchu wawáy?...
Jehovaqa Rahabta, familiaresninta ima salvarqa
Qhepan diasninmantaj israelitasqa, chay llajtaj muyuyninta sapa día uj kutita chʼinllamanta muyurerqanku. Chaytaqa sojta diata ruwarqanku. Qanchis kaj diapitaj, kallpawan qhaparispa, qanchis kutita llajtata muyurerqanku. Jinallapi Jehovaqa llajtaj perqasninta ujllata thuñirarqa. ¿Rahabpa wasinrí thuñikorqachu? Puka waskha, ventananpi warkhusqa kasqanrayku mana thuñikorqachu. ¿Dibujopi chay puka waskhata rikunkichu?... Rahabwan familiaresninwanqa, ¡ajinapi salvakorqanku!
¿Imatataj Rahabmanta yachakusunman?... Rahabqa Jehovapi atienekorqa. Tʼukuna imasta ruwasqantataj yacharqa. ¡Qanpis Jehovamanta sumajta yachakushanki! ¿Rahab jinallatajchu Jehovapi atienekunki wawáy?... ¡Arí!