Sapayakuspa, manchhikuspataj ¿imatá ruwawaj?

Kay wawitaqa sapitallan, manchhasqataj kashan, ¿icharí? ¿Qanrí, maykʼajllapis manchachikorqankichu chayri sapayakorqankichu?... Tukuychá ajinapi rikukorqanchej. Bibliaqa, Diosta munakoj runaspis ajinapi rikukusqankuta nin. Paykunamanta ujnenqa Elías karqa. Kunanqa paymanta parlarina.

Eliasqa unay tiempo runa karqa, Israelpitaj kausakorqa, niraj Jesús nacekushajtin. Chay tiempopeqa Israelta kamachej Achab, warmin Jezabel ima, Jehová Diosta mana munakorqankuchu. Llulla dios Baaltataj yupaycharqanku. Chayrayku, ashkha israelitaspis Baalta yupaycharqanku. Reina Jezabelqa sajra warmi karqa, Jehovata kasukojkunatataj wañurachiyta munarqa. Eliastapis wañuchiyta munallarqataj. ¿Imatá Elías ruwanman karqa? ¿Qanrí imatá ruwawaj karqa?...

Eliasqa karuman, chʼinnejmantaj ayqekorqa, uj juskʼuman pakakoj. ¿Imaraykutaj chayman pakakoj rerqa?... Arí, manchachikusqanrayku. Jinapis Eliasqa, mana manchachikunanchu karqa, imaraykuchus Jehová yanapananta yacharqa. Jehová may atiyniyoj kasqantapis yacharqaña. Chayraykutaj uj kutipi Diosmanta mañakorqa, Diostaj uyarerqa, cielomanta ninata uraykuchimuspa. Chayrayku Eliasqa Jehovapi atienekuyta aterqa.

Elías chhanka juskʼupi kashajtin, Jehová taporqa: “¿Imaraykutaj kaypi kashanki?”, nispa. Eliastaj kuticherqa: “Noqallaña qhepakuni. Ni pí kasusunkiñachu. Noqata wañuchinawankutapis manchachikuni”, nispa. Eliasqa, Diosta yupaychajkunata tukuyninta wañurachisqankuta yuyarqa. Jehovataj nerqa: “Mana qanllañachu kashanki. Astawanpis 7.000 runasraj yupaychashawanku. Ama manchachikuychu. Kamachisusqaytaraj juntʼanayki tiyan”, nispa. Eliasrí chayta uyarispa, ¿kusikorqachu?... Arí, kusikorqa.

Kunanqa, Elías chay tukuy imaspi rikukusqanpi tʼukuriy. ¿Imatá paymanta yachakunki wawáy?... Ichá wakin kuteqa, sapayakusunman, manchachikusunmantaj. Jinapis Jehovata, qanta ima munakoj amigosniyoj kanki. Jehovaqa may atiyniyoj, yanapasonqapunitaj. Chayta yachaspa, ¿kusikunkichu wawáy?...