Davidqa mana manchachikorqachu

¿Imatá ruwanki manchachikuspa?... Ichá tataykiman chayri mamaykiman qayllaykunki yanapasunanpaj. Chaywanpis, ¿pichus astawan yanapasunanta yachankichu wawáy?... Arí, Jehová. Paytaqa, ni pí atipayta atinchu. Paymantataj yanapasunanta mañakuwajpuni. Davidpis chayta ruwarqa. Jehovapi atienekorqa nitaj manchachikorqachu. Paymantaqa Bibliapi parlan.

Davidtaqa, tatasnin wawitamantapacha, Jehovata munakunanpaj yachacherqanku. Chaytaj mana manchachikunanpaj yanaparqa, mayta manchachikunapaj jina kajtinpis. Davidqa yacharqa, Jehová amigon kasqanta, pay yanapanantataj. Uj kuti, David ovejasninta michishajtin, uj león jamuspa ujnin ovejitanta apakaporqa. ¿Imatá David ruwarqa? Leonpa qhepanta rispa, ovejitanta qhechumorqa, leontataj wañucherqa. Uj osotapis kikillantataj ruwarqa. ¿Pitaj Davidta mana manchachikunanpaj yanaparqa?... Arí, Jehová yanaparqa.

Davidqa, waj kutipipis nillataj manchachikorqachu. Chaytaj karqa israelitas filisteospa contranpi maqanakushajtinku. Ujnin filisteoqa, may jatun runa karqa. Payqa Goliat sutikorqa. Goliatqa, israelita soldadosmanta, Jehovamantawan asikoj. Soldadostataj nerqa: “¡Pitaj noqawan maqanakuyta munan!”, nispa. Tukuytaj manchachikoj kanku, ni pipis paywan maqanakuyta munajchu. Davidrí, Goliat nisqanta uyarispa, nerqa: “¡Noqa qanwan maqanakusaj! ¡Jehová yanapawanqa, atipasqaykitaj!”, nispa. ¿David manacharí manchachikojchu?... Arí, mana manchachikojchu. Chaymanta qhepaman imachus kasqanta yachayta, ¿munawajchu?

Davidqa, phishqa rumisitusta, uj warakʼatawan oqharikorqa. Chay jatun runawantaj maqanakoj rerqa. Goliattaj, Davidta yoqallituta rikuspa asiykukorqa. Chayrayku David nerqa: “Qanqa espadawan jamushawanki, noqataj Jehovaj sutinpi jamushayki”, nispa. Jinaspataj Goliatman correrqa, warakʼarparerqataj. Frentenpi japʼichejtin, chay jatun runaqa, pampaman wañusqa wijchʼukorqa. Filisteosqa, chayta rikuspa mancharikorqanku, ayqekorqankutaj. ¿Imaraykutaj David yoqallitullaraj kaspapis Goliatta atiparqa?... Davidtaqa, Jehová Dios yanaparqa. Diosqa, mayqen jatun runamantapis, ¡aswan atiyniyoj!

¿Imatá Davidmanta yachakunchej?... Jehovaqa, mayqen runamantapis aswan atiyniyoj kasqanta. Chayrayku maykʼajllapis manchachikuspaqa, kayta yuyarikuy wawáy: Jehová amigoyki kasqanta, paytaj mana manchachikunaykipaj yanapasonqa.